Autoritetet arsimore në Los Anxhelos votuan dje në favor të ndalimit të plotë të përdorimit të telefonave inteligjentë në shkollat e qytetit.
Lëvizja vjen pasi guvernatori i Kalifornisë, shteti më i populluar në SHBA, ka shprehur mbështetjen e tij për kufizimet në përdorimin e celularëve, ndërsa rritet shqetësimi për efektet e përdorimit të këtyre pajisjeve në shëndetin mendor të të rinjve.
Bordi i Arsimit i Los Anxhelosit, i cili mbikëqyr distriktin e dytë më të madh shkollor në vend, i ka kërkuar stafit mësimdhënës që të hartojë një plan që do të ndalonte përdorimin e celularëve dhe mediave sociale gjatë gjithë ditës së shkollës.
Vendimi për ndalimin e celularëve citon rezultatet e hulumtimit që tregojnë se përdorimi i tepërt i telefonave celularë lidhet me rritjen e stresit, ankthit, depresionit, çrregullimeve të gjumit, agresionit dhe tendencave për vetëvrasje tek adoleshentët.
Disa orë përpara votimit, guvernatori i Kalifornisë Gavin Newsom ofroi mbështetjen e tij për përpjekjet për të ndaluar përdorimin e celularëve.
/abcnews.al
