Loading ...
Andy Burnham është bërë kryeministri i parë britanik i cili ka deklaruar se Rusia ka ndërhyrë në referendumin e vitit 2016 për daljen e Mbretërisë së Bashkuar nga Bashkimi Evropian, duke bërë të ditur se ishte informuar për ndërhyrjen e Moskës përgjatë procesit të Brexit-it pasi mori zyrtarisht detyrën në Downing Street.
Gjatë një interviste në podcast-in The Rest Is Politics, Burnham tha se, me të marrë detyrën këtë verë, kishte pyetur nëse Moska kishte ndërhyrë në procesin e referendumit dhe kishte marrë një përgjigje pohuese.
“Kam marrë përgjigjen e qartë se po, ka pasur ndërhyrje”, tha ai, duke shtuar se këto informacione duhet të bëhen publike, në mënyrë që votuesit në Gjermani dhe Francë të kuptojnë se si aktorë të huaj mund të ndikojnë në proceset politike.
Burnham paralajmëroi se Mbretëria e Bashkuar nuk ka reaguar mjaftueshëm ndaj përpjekjeve të huaja për të ndikuar në politikën e brendshme, duke argumentuar se qytetarët nuk janë informuar sa duhet për kërcënimet ndaj proceseve demokratike.
Deklaratat vijnë në një kohë kur është rihapur debati për marrëdhëniet e Britanisë me Bashkimin Evropian. Në konferencën vjetore të Partisë Laburiste muajin e kaluar, kryeministri tha se qeveria do të shqyrtonte mundësitë për afrimin e vendit me bllokun evropian.
Gjithashtu, është ngritur mundësia që rikthimi në BE të përfshihet në programin elektoral të laburistëve për zgjedhjet e ardhshme.
Gjatë një vizite të fundit në Berlin, Burnham tha se kishte diskutuar me kancelarin gjerman Friedrich Merz për ndikimin rus në politikën gjermane, duke iu referuar përhapjes së keqinformimit dhe dezinformimit.
Ndërkohë, në vitin 2020, Komiteti Parlamentar për Inteligjencën dhe Sigurinë në Mbretërinë e Bashkuar konstatoi se qeveria nuk kishte vlerësuar plotësisht ndikimin e mundshëm të mediave të kontrolluara nga shteti rus dhe të llogarive të ashtuquajtura “troll” në rrjetet sociale gjatë referendumit për Brexit-in.
