Lista Serbe ka paralajmëruar për incidente, pas vendimit të Kuvendit Komunal të Mitrovicës së Veriut për hapjen e qarkullimit të automjeteve dhe lëvizjes së lirë në urën mbi lumin Ibër.
Përmes një postimi të shpërndarë në rrjetet sociale, Lista Serbe shprehet se ky vendim shkel marrëveshjet e Brukselit dhe kërcënon paqen në këtë zonë.
Sipas pretendimeve të Listës Serbe, vendimi është vazhdim i pushtimit të Veriut nga kryeministri i Kosovës, Albin Kurti.
“Lista Serbe dënon ashpër vendimin e kundërligjshëm dhe jolegjitim të shumicës së paligjshme dhe jolegjitime parlamentare në Mitrovicën e Veriut për hapjen e urës kryesore të qytetit për qarkullimin motorik, gjë që shkel marrëveshjet e Brukselit dhe kërcënon drejtpërdrejt paqen në këtë zonë. Duam të paralajmërojmë se hapja e mundshme e urës padyshim që do të rezultojë me incidente në këtë zonë, gjë që duket se është edhe qëllimi i Prishtinës.
Kërkojmë që KFOR-i, EULEX-i dhe përfaqësuesit e bashkësisë ndërkombëtare urgjentisht të pengojnë zbatimin e këtij vendimi, t’i japin hapësirë për zgjidhjen e çështjeve të hapura në dialog dhe në këtë mënyrë të ruajnë paqen në këto fusha. Parandalimi i lëvizjeve të tilla nga ana e këshilltarëve të Prishtinës dhe Kurtit do të ishte në përputhje me kërkesat e bashkësisë ndërkombëtare për të ndaluar të gjitha veprimet që cenojnë procesin e dialogut”, thuhet në njoftim.
