Në Lezhë mungojnë teknologët dhe për këtë arsye produktet ushqimore janë pa kontroll. Nevoja në Lezhë është për më shumë se 150 teknologë.
Fabrikat dhe stabilimentet e përpunimit të produkteve ushqimore në Lezhë kanë vështirësi për të siguruar teknologë që kontrollojnë sigurinë e këtyre produkteve.
Aktualisht nevoja është për të paktën 150 specialistë me një tendencë gjithnjë në rritje. Këto nevoja aktuale mbulohen me punonjës që mund ta kenë përvetësuar ketë aftësi vetëm gjatë punës në këto ndërmarrje.
Shqetësimin e kanë sjellë vetë bizneset e këtij sektori duke sugjeruar edhe ndërhyrje tek arsimi profesional në Lezhë.
Alban Zusi: “Po ta marrim mesataren për çdo 10 veta 1.5 njerëz të kualifikuar, ka nevojë aktuialisht për 150 vetë”.
Prodhuesit e ushqimeve në Lezhë ishin thirrur në një takim nga shkolla profesionale e cila sëbashku me zyrën e punësimit do të propozojnë që vitin e ardhshëm të hapet dega për teknologji ushqimore në Lezhë.
Diskutimet do të vijojnë tani me Ministrinë e Financave dhe Ekonomisë në mënyrë që të lobohet që në shkollën profesionale të Lezhës të shtohet edhe dega për teknologji ushqimore. /abcnews.al
