Lëvizja Vetëvendosje në Kosovë po zhvillon zgjedhjet e brendshme, ndërsa Albin Kurti shprehet se partia do të jetë më e fuqishme me strukturat e reja.
“Ashtu siç e parasheh statuti ynë e siç e kërkon demokracia e brendshme, Lëvizja Vetëvendosje ka shpallur zgjedhjet e brendshme të përgjithshme. Nga 20 shtatori, secili anëtar i Lëvizjes, dhe kurdo që është anëtarësuar, do të ketë të drejtë për të votuar e për t’u kandiduar.
Zgjedhjet do të jenë të drejtpërdrejta, të lira e demokratike. Në fund të këtij procesi do të kemi struktura edhe më të fuqishme ashtu siç e kemi edhe mbështetjen e jashtëzakonshme të qytetarëve.
Në 30 qendra të Lëvizjes në Kosovë e 13 qendra në mërgatë, anëtarët e Lëvizjes do të kenë mundësi që përmes parimit “një anëtar, një votë” të zgjedhin kryesitë e kryetarët e pikave nëpër lagje e fshatra, të propozojnë kandidatët që vlerësojnë më së shumti apo edhe të vetpropozohen.
Të gjithë anëtarët do të kontaktohen për të marrë pjesë në zgjedhje, kurse ju që mbështetni Lëvizjen, por nuk jeni anëtarësuar ende, vizitoni zyret e Lëvizjes Vetëvendosje në komunën tuaj dhe anëtarësohuni që të bëheni pjesë e këtij procesi demokratik.
Lëvizja fton të gjithë anëtarët që të bashkohen në këtë proces zgjedhor. Bashkë në organizim – bashkë në drejtim” thotë Albin Kurtin.
