Chelsea dështoi të kualifikohej në çerekfinalet e Carabao Cup, por Frank Lampard nuk e bën dramë. Ekipi londinez u mposht 1-2 në shtëpi nga Manchester United. Trajneri aktivizoi lojtarët e stolit dhe u dha një mundësi atyre për të treguar veten.
Goli i Batshuayiu nuk mjaftoi dhe “Djajtë e Kuq” avancuan më tej falë dygolëshit të Markus Rashford. Kjo humbje nuk e shqetëson trajnerin e Chelsea, i cili ka prioritete të tjera. Djemtë e tij po luftojnë fort për t’u kualifikuar më tej në Champions League (renditen në vend të parë me nga 6 pikë bashkë me Ajaksin në grupin H) dhe ndajnë vendin e tretë në kampionat bashkë me Leicester City.
“Zhvilluam një ndeshje shumë të vështirë në Champions League kundër Ajaksit. Mos ta harrojmë që ne konkurrojmë edhe në Champions. Është thelbësore për ne që të kualifikohemi më tej. Na presin ndeshje të shumë të vështira në vijim. Në kampionat nuk jemi keq dhe mund të them që prioritetet tona janë të qarta“, thekson trajneri i “Bluve të Londrës”. /abcnews.al
