I dërguari i posaçëm i Bashkimit Evropian për dialogun Kosovë-Serbi, Miroslav Lajçak, javën e ardhme do të vizitojë Prishtinën, ka mësuar Telegrafi.
Kjo vizitë vjen pas paralajmërimeve se plani franko-gjerman, i njohur edhe si plani “evropian”, për ta zgjidhur çështjen politike mes Kosovës dhe Serbisë, pritet të intensifikohet në fillim të janarit.
Të mërkurën që lamë pas në Prishtinë qëndroi për vizitë zyrtare këshilltari i lartë i Departamentit amerikan të Shtetit, Derek Chollet, i cili u takua me kryeministrin Albin Kurti dhe presidenten Vjosa Osmani.
Gjatë qëndrimit në kryeqytetin kosovar ai kërkoi formimin e Asociacionit të Komunave me shumicë serbe, duke thënë se “Kosova duhet të përmbushë të gjitha zotimet në kuadër të dialogut, përfshirë edhe formimin e Asociacionin” dhe se presin nga “Qeveria e Kosovës të vendosë disa propozime në tryezë”.
Se Asociacioni është obligim i detyrueshëm ligjor për të gjitha palët dhe nga ai nuk mund të ikë një parti apo një individ e tha të enjten edhe zëvendësndihmës të sekretarit amerikan të Shtetit, Gabriel Escobar.
Respektim të marrëveshjeve të Brukselit, përfshirë Asociacionin, të enjten kërkoi edhe ambasadori gjerman në Prishtinë, Jorn Rohde, i cili tha se Kosova ende s’ka një propozim për këtë çështje, por se sipas tij, duhet formuar në përputhje me Kushtetutën.
Për këtë çështje ndonëse jo për të parën herë, u deklarua edhe kryeministri i Kosovës, Albin Kurti, gjatë vizitës në Vjenë, në një konferencë të përbashkët me kancelarin austriak, Karl Nehammer.
Ai tha se Asociacioni mund të adresohet brenda një marrëveshjeje eventuale për normalizimin e plotë të raporteve midis Kosovës dhe Serbisë.
Para mediave, Kurti u shpreh se Kushtetuta e Kosovës, e cila i ka dhënë shume privilegje pakicës serbe, nuk lejon në frymën e saj Asociacion njëetnik.
“Jemi në një moment kur flasim e diskutojmë për normalizim të plotë të marrëdhënieve Kosovë-Serbi. Aty mund të adresohet edhe çështja e Asociacionit. Megjithatë, sipas Kushtetutës së Republikës së Kosovës, e cila i ka dhënë shumë privilegje pakicës serbe dhe është përpiluar nga z.Ahtisari, nuk lejon në frymën e saj Asociacionin njëetnik. Fjalia e parë e atij plani që është hartuar nga Ahtisari thotë se Kosova duhet të jetë shoqëri multietnike”, deklaroi ai.
Ndryshe, Kosova dhe Serbia, në kuadër të dialogut të ndërmjetësuar nga Bashkimi Evropian, kanë arritur dy marrëveshje sa i përket Asociacionit, përkatësisht më 2013 dhe 2015.
Asociacioni i komunave me shumicë serbe parashikohet që të mbledhë rreth vetes dhjetë komuna në Kosovë të banuara me shumicë serbe: Mitrovicë e Veriut, Kllokot, Partesh, Ranillug, Graçanicë, Zveçan, Zubin Potok, Novobërdë, Leposaviq dhe Shtërpcë.
Sipas marrëveshjeve, Asociacioni ka për qëllim të përfaqësojë interesat kolektive të këtyre komunave, veçmas në fushën e arsimit, shëndetësisë, planifikimit urban dhe rural si dhe të ekonomisë.
