Loading ...
Mbrëmjen e djeshme në Rai 3 është publikuar një investigim për Igli Taren, për të cilin janë rikthyer edhe një herë dyshimet në lidhje me kompaninë Top Bast, që para tre vitesh është pretenduar se e posedonte Igli dhe vëllai i tij, Genti.
Emisioni Report i është kthyer edhe një herë kësaj çështje, por ka hedhur hije dyshimi edhe për transferimin e Vedat Muriqit, i cili u ble për 18 milionë euro nga Fenerbahce dhe nuk ka arritur të tregojë veten e tij tashmë.
Në një moment të emisionit, gazetari Vincenzo Morabito shprehet: “18 milion? Muriqi nuk e prek topin. Radu më tha në stërvitje se kur duhet ta markojë Muriqin në stërvitje, vesh shapkat dhe rehatohet me duar pas kokës”.
Kësaj deklarate dytën e sotme i është përgjigjur menjëherë mbrojtësi i Lazios, Stefan Radu, që përgënjeshtron gjithë atë që ka thënë Morabito dhe shprehet se përmes avokatit të tij do e hedhë në gjyq gazetarin për shpifje.
“Pas deklaratës së Vincenzo Morabito gjatë transmetimit të Report mbrëmjen e djeshme në Rai 3, unë hedh poshtë me forcë pretendimet se unë kam diskredituar aftësitë e shokut tim të skuadrës Vedat Muriqi.
Sjelljet e këtij lloji nuk më përkasin mua dhe përhapja publike e këtyre deklaratave dëmton rëndë personin tim. Prandaj, unë njoftoj se u kam dhënë një mandat avokatëve të mi për të mbrojtur imazhin tim profesional në të gjitha mënyrat e duhura”, shkruan Radu. D.L/abcnews.al
