Kukësi arriti një fitore tepër të rëndësishme ndaj Laçit në sfidën e javës së 10-të të Superligës. Skuadra e trajneri Cungu iu afrua vendeve të para, veçse ndeshja ishte një zhgënjim nga të dy ekipet.
Kishin pasur të drejtë tifozët që e kishin braktisur totalisht. Vetëm disa dhjetëra spektatorë ishin në stadiumin “Elbasan Arena” për ndeshjen e quajtur të rëndësishme në Superligë, atë mes Laçit e Kukësit. Dy skuadra që kanë braktisur qytetet e tyre, dhe që janë braktisur nga përkrahësit, u përpoqën të patën të merrnin pikët, në një ndeshje të dobët, në një impiant modern për kushtet e Shqipërisë. Ia doli Kukësi që bëri pak më shumë, duke e lehtësuar disi trajnerin gjithnjë në tension, Armando Cungu. Pas një fillimi të vështirë, shkodrani po e ngjit skuadrën në vendet e larta të renditjes, pavarësisht se çfarë niveli po japin lojtarët e tij në fushë. Fitore 1-0 me gol të shënuar nga Uillian në pjesën e dytë, sapo ishte mbushur një orë lojë.
Po me Laçin ç’po ndodh?
Dy humbje radhazi e kanë zbehur jo pak imazhin e një ekipi të pathyeshëm deri pak ditë më parë. Një situatë, gjithsesi, normale për një skuadër pa emër të madh, dhe jo me përbërjen e sezoneve të kaluara Kukësi tashmë ka 19 pikë, vetëm 1 pikë më pak se Skënderbeu i vendit të dytë, por që ende nuk e ka luajtur ndeshjen e javës së 10-të. Kurbinasit, ndërkaq, mbetën në kuotën 16 pikë, duke qenë të rrezikuar nga skuadrat e mesit të tabelës si Flamurtari apo Teuta. Në ndeshjen tjetër të së dielës, Luftëtari fitoi 2-0 në Fushë Krujë ndaj Kastriotit, duke dalë mbi Kamzën në klasifikim./abcnews.al
