Kryeministri i Zelandës së Re, Chris Hipkins është diagnostikuar me Koronavirus dhe do të punojë nga distanca në izolim derisa të shërohet, tha zyra e tij, dy javë përpara zgjedhjeve të vendit të Oqeanisë.
Hipkins ka simptoma të ftohjes dhe gripit që filluan të shtunën dhe do të qëndrojë në izolim për pesë ditë, ose derisa të dalë negativ në testin për SARS-CoV-2, shpjegoi njoftimi për shtyp nga shërbimet e tij.
“Ai do të vazhdojë punën që mund të bëjë përmes Zoom”, sipas të njëjtit burim.
Zhvillimi i simptomave të COVID-19 do të thotë që Hipkins përkohësisht nuk do të jetë në gjendje të vazhdojë fushatën përpara zgjedhjeve të përgjithshme të 14 tetorit, në të cilat Partia e tij e Punës pritet të luftojë për të mbajtur pushtetin.
Hipkins do të merrte pjesë sot në një shërbesë kishtare samoane në Auckland. Ai do të zëvendësohet nga Zëvendëskryeministri Carmel Sepuloni, sqaron Kryeministria.
Në njoftim gjithashtu theksohet se do të bëhen njoftime për ecurinë e gjendjes së tij kur të kërkohet./abcnews.al
