Kryeministri i Australisë, Scott Morrison, u shpreh se Facebook është përsëri në tryezën e dialogut pas vendimit për të bllokuar shpërndarjen e lajmeve.
Ekzekutivi i lartë i Facebook, Simon Milner, u detyrua që të kërkojë falje pasi kompania ndaloi hyrjen në llogaritë e drejtuara nga organet qeveritare dhe departamentet shtetërore të shëndetit, në një kohë kur në Australi po zhvillohet fushata e vaksinimit.
Morrison tha se e mirëpriste faljen e Milner, duke theksuar se mbyllja e llogarive të informacionit publik nga Facebook ishte e pajustifikueshme.
Facebook fillimisht pretendoi se nuk kishte zgjidhje tjetër veçse të bllokonte hyrjen në faqet e shërbimeve shëndetësore dhe të urgjencës, duke argumentuar se kodi i bisedimeve në media ishte i formuluar keq.
Përplasja e Australisë me Facebook erdhi pas zhvillimit të një projekt-ligji i cili u mundëson botuesve të lajmeve që të negociojnë për kompensimin që marrin nga gjigantët e teknologjisë.
Kritikët kanë thënë se Google dhe Facebook fitojnë shumë përmes përmbajtjes së mediave në internet, por nga ana tjetër nuk u japin atyre vlerën që u takon, ose u japin fare pak.
Propozimi përfshin një rrjet të sigurt negociatash si një përpjekje për të parandaluar kompanitë që të dominojnë negociatat./abcnews.al
