Kryetari i Partisë Demokratike të Kosovës, Memli Krasniqi, ka akuzuar Qeverinë Kurti se i ka lënë nxënësit pa tekste mësimore, ndërsa tha se deputetët e pushtetit po i ikin ballafaqimit në Kuvend.
“Veprimet e gabimet e kësaj Qeverie po e bëjnë të jashtëzakonshme seancën. Do të duhej të diskutonim për reformën në arsim, mundësitë e reja që i ka krijuar kjo Qeveri. Për herë të parë pas shpalljes së pavarësisë, kjo Qeveri i ka lënë nxënësit, fëmijët e Kosovës pa libra shkollorë, e turpshme dhe shkelje e ligjit. Kjo ministre ka përgjegjësi penale, e kanë shkelur ligjin, kanë trefishuar koston e librave” u shpreh Krasniqi.
Sipas deputetit opozitar, në vend që Qeveria t’i shpenzojë 4.8 milionë euro në blerjen e teksteve shkollore, po shpenzon 12 milionë euro.
“Vitin e kaluar i kanë fajësuar mësimdhënësit duke iu thënë se janë të paaftë ,e sivjet prindërve ua kanë vendosur një barrë të re të vrapojnë poshtë e lartë të blejnë libra. 100 pyetje është dashur të bëhen në këtë seancë”, shtoi ai.
