Xhudistja Nora Gjakova nuk ka të ndalur në kompeticionet ndërkombëtare. Sot, në Montpelje të Francës, Nora Gjakova fitoi medaljen e bronztë në kategorinë deri 57 kilogramë. Ajo mposhti gjermanen Seija Balhaus me “Ippon” në kohën shtesë.
Për Norën është medalja e shtatë në Kampionate Europiane, ku ka koleksionuar një të artë, një të argjendtë dhe pesë të bronzta. Për Kosovën është medalja e 21-të nga Kampionatet Europiane për seniorë. Të tjera medalje synohen të shtunën, pasi garojnë Akil Gjakova, Laura Fazliu dhe Loriana Kuka.
Në kategorinë deri 57 kg, të premten garoi edhe Flaka Loxha. Në luftën e parë ajo e mposhti bullgaren Ivelina Ilieva. Por në raundin e dytëe pësoi nga serbja Marica Perishiç.
Dy medalje, të argjendtë nga Dristia Krasniqi dhe të bronztë nga Nora Gjakova, nga tri garuese është bilanci i Kosovës në ditën e parë të Europianit.
