Është mbajtur sot Kongresi i jashtëzakonshëm i Aleancës për Shqiptarët në Maqedoninë e Veriut, thirrur nga Ziadin Sela.
Me 591 vota është shkarkuar Arben Taravari nga pozita e kryetarit të Aleancës për Shqiptarët. Ziadin Sela si kandidat i vetëm rimori drejtimin e partisë.
Sela theksoi se ashtu siç edhe ka vepruar deri më sot do të vazhdojë të ndjekë rrugën e transparencës, ndershmërisë dhe dinjitetit.
“Ju sigurojë se do ta udhëheq partinë ashtu sikurse e kam udhëheq, me dinjitet me transparencë, çdoherë i gatshëm që të bisedojmë dhe bashkëbisedoj me anëtarësinë dhe t’i përballojmë argumentet para njëri tjetrit”, tha Sela.
Sipas Selës, bashkëpunimi me Aleancën për Shqiptarët është i rëndësishëm për të përfaqësuar interesat e shqiptarëve në Maqedoni dhe për të gjetur zgjidhje për problemet e tyre. Ai gjithashtu theksoi se ndryshimi ka kuptim vetëm përmes bashkëpunimit me ASH, duke e paraqitur atë si partnerin kryesor për zhvillimin e politikës shqiptare në Maqedoni.
/abcnews.al/
