Loading ...Ministria e Ekonomisë dhe Inovacionit Delina Ibrahimaj tha se rritja e çmimit të karburanteve pritet të ndikojë drejtpërdrejt edhe në çmimet e inputeve bujqësore dhe ushqimeve, pasi industria funksionon mbi bazën e tyre.
“Nuk kam informacion për inputet bujqësore. Në kohën e krizës së Ukrainës pati një rritje të çmimit të inputeve bujqësore, sepse pjesa më e madhe vinte nga Ukraina. Në dijeninë time, kanalet e furnizimit kanë mbetur ato që janë. Jo vetëm inputet bujqësore, por edhe vetë çmimi i karburantit do të ndikojë në çmimin e tyre.
Ne do të kemi një reflektim në çmimin e tyre, sepse vetë industria funksionon me karburant. Si efekt i rritjes së çmimit të karburanteve, ushqimet do të ndikohen.”
Ministria Ibrahimaj theksoi se në të gjitha krizat, qeveria ka reaguar me paketa mbështetëse për kategoritë e prekura, duke arritur të ruajë rritjen ekonomike dhe të zbusë ndikimin e tyre te familjet shqiptare.
Ibrahimaj tha se sektorët po monitorohen për të marrë masa në kohë, duke pranuar se rritja e çmimeve globale do të reflektohet në ekonominë e vendit.
“Në të gjitha krizat ne kemi reaguar me plane masash për kategoritë e prekura. Në rast pandemie bëmë pagat e luftës, në rastin e luftës në Ukrainë bëmë disa paketa masash. Përveç zhurmës, e vërteta është që në pandemi, që në tremujorin e fundit, ne arritëm të çonim rritjen ekonomike në rritje sepse kishim fokusin tek bizneset. Në krizën në Ukrainë, ndryshe nga çfarë spekulohej nga opozita, rritja ekonomike vijoi; pati rritje të punësimit, por inflacioni u rrit dhe ne bëmë paketat. E menaxhuam krizën që familjet të mos goditeshin nga kriza globale.
Në këtë rast, monitorimin e sektorëve jemi duke e bërë për arsye që të marrim masat në kohën e duhur. Ne jemi një ekonomi që importon një pjesë të madhe të produkteve; rritja e çmimeve globale do të importohet, por detyra jonë është t’u qëndrojmë pranë atyre që kanë nevojë.”
