Një rast i murtajës bubonike është regjistruar në një spital të rajonit kinez të të Mongolisë së Brendshme. Autoritetet në qytetin e Bayan Nur kanë ngritur alarmin për gjuetinë dhe ngrënien e kafshëve që mund të jenë bartëse të murtajës.
Njerëzve u është thënë që të raportojnë çdo rast të dyshuar të murtajës apo temperaturë si dhe të raportojnë çdo rast brejtësish të sëmurë apo të ngordhur.
Alerti i nivelit të tretë i dhënë ditën e djeshme, i dyti më i ulët në një sistem me katër nivele, vjen pas 4 raportimeve për murtajë në njerëz nga Mongolia e Brendshme, nëntorin e kaluar.
Mes tyre përfshihen dy raste të murtajës pneumonike, një variant më vdekjeprurës i murtajës, raportojnë mediat.
Murtaja bubonike, e njohur ndryshe edhe si “Vdekja e Zezë”, në Mesjetë, është një sëmundje shumë ngjitëse dhe shumë shpesh fatale që shpërndahet kryesisht nga brejtësit.
Rastet me murtajë nuk janë të pazakonta në Kinë, por “shpërthime” të tilla janë bërë gjjithnjë e më të rralla. Nga viti 2009 deri në vitin 2018, Kina ka raportuar 26 raste dhe 11 vdekje. /abcnews.al/
