LEZHË– Me një laptop dhe shumë pasion, Nikolas Gjoni nga Lezha, nxënës i shkollës 9-vjeçare të muzikës në këtë qytet i është dedikuar kompozicionit. Pasioni për muzikën nisi teksa ndiqte gjyshin e tij kur luante me vegla popullore, por prindërit e shtyn me tej duke parë interesin dhe talentin e tij.
Hapja e klasave të muzikës në shkollën “Besëlidhja” e bënë që përveç pianos të përzgjidhte edhe instrumentin e fizarmonikës. Gjithnjë pëlqen të improvizojë teksa luan pjesët, për mësuesin Berhan Kraja, tek Nikolasi shquhej orientimi i tij drejt kompozicionit qysh në moshë të vogël.
Të kompozosh është e vështirë, por Nikolasi frymëzohet nga kompozitorët e mëdhenj. Prej 3 vitesh vazhdon të krijojë dhe deri tani ka 20 pjesë ndërsa të tjera janë në proces. Ai u rikthehet për t’i riparë pasi sa më shumë mëson aq më shumë kupton se çfarë duhet të bëjë.
Nuk e ka ende në mendje atë vepër që do t’i japë më shumë sukses, por beson se kjo do të ndodhë së shpejti e në të ardhmen do të jetë një kompozitor i njohur./ abcnews.al
