Komiteti hetimor i Kongresit të SHBA arriti në përfundimin se Covid-19 ka shumë të ngjarë të ketë origjinën nga një laborator në qytetin kinez Wuhan, dhe se masat e distancimit social dhe mbajtja e maskave gjatë pandemisë u futën pa prova shkencore për t’i mbështetur ato.
Në raportin e tij përfundimtar prej 520 faqesh, Komiteti deklaroi se virusi kishte karakteristika biologjike jo të pranishme në natyrë, si dhe të dhëna që tregojnë se të gjitha rastet e virusit lindën nga një infeksion i vetëm fillestar tek njerëzit, shkruan Fox News.
Ai gjithashtu vuri në dukje se laboratori kryesor i Kinës për kërkimin SARS ishte vendosur në Wuhan, një qytet i njohur për kryerjen e kërkimeve mbi virusin me biosiguri të pamjaftueshme.
Studiuesit në atë laborator u infektuan me një virus të ngjashëm me koronavirus tashmë në vjeshtën e vitit 2019, që ishte disa muaj para se virusi të shpërthente në tregun e Wuhan-it.
Edhe pse në fillim të pandemisë kishte zëra se tregjet e Wuhan, të njohura për kushtet e tyre josanitare, ishin burimi i virusit, Komiteti nuk gjeti asnjë provë për të mbështetur këtë teori.
Raporti thekson gjithashtu se masat e distancimit social nuk ishin “të bazuara në shkencë”.
Anthony Fauci, ish-drejtori i Institutit Kombëtar të Alergjisë dhe Sëmundjeve Infektive të SHBA-së, tha se udhëzimet për distancimin shoqëror “thjesht u shfaqën”, pa kërkime adekuate shkencore për t’i mbështetur ato.
Komiteti gjithashtu zbuloi se nuk kishte “prova konkrete” që mbajtja e maskave siguron mbrojtje kundër koronavirusit./abcnews.al
