Kjo javë ka qenë e gjitha për Liverpoolin, ku më në fund ata u rikthyen te titulli kampion pas plot 30 viteve. Po flitet shumë për arkitektin e kësaj skuadre, Jurgen Klopp, se si ai erdhi në 2013 dhe e riktheu Liverpoolin në majat e futbollit anglez dhe europian. Madje ka patur dhe një prapaskenë, ku trajneri gjerman ka qenë shumë pranë kalimit te Manchester United.
Ka qenë pikërisht ish-ylli i “The Reds”, Phil Thompson, ai që e ka zbuluar ku thekson se ishte gruaja e Jurgenit ajo që mori vendimin përfundimtar. “ E intervistova Kloppin për Sky dhe e pyeta nëse ai dhe Liverpool ishin bërë për njëri tjetrin. Ai më pa në sy dhe më tha “Përse”, deklaron anglezi për TV2 në Norvegji.
“Më pas më tha se ai ishte shumë pranë Manchester United, por ishte gruaja e tij që nuk e dëshironte kalimin te “Djajtë e Kuq”. Kur erdhi oferta nga Liverpool, ajo i kishte thënë se ishte e duhura”, mbyll Phil. Më pas gjithçka dihet. Manchester United ndërroi katër trajnerë, në të njëjtën kohë kur Klopp udhëhoqi Liverpoolin drejt triumfit në Champions League, Premier League, Kupën e Botës për Klube si dhe Superkupën Europiane. /abcnews.al
