Në Gjirokastër e njohin të gjithë. Është Arsitotel Gushi, mjek kirurg prej gati 60 vitesh. Tregon se mjekësinë nuk e donte fillimisht, por edhe pse degë e vështirë ja doli të diplomohej me rezultate të larta.
Thotë se atë kohë kërkesa e pedagogëve ishte e lartë aq sa nga 400 studentë u diplomuan vetëm 90. Për herë të parë profesionin e ushtroi në Tiranë dhe pas tre viteve u transferua në Gjirokastër, qytetin e tij, ku bluzën e bardhë e mbajti veshur deri ditën që doli në pension.
Kujton se bashkë me kolegët kanë kryer shumë operacione të vështira. Mjetet mungonin dhe teknologjia nuk ishte kjo e sotmja, por të gjitha ndërhyrjet kanë qenë të suksesshme.
Megjithatë thotë se kishte vend për pune më të mirë. Ka brenga që i prishin gjumin. Këto kohë i është rikthyer një pasioni të vjetër, muzikës. Thotë se mes tingujve të instrumenteve gjen qetësi.
Aristotel Gushi sot është 82 vjeç dhe ka vite që bluzën e bardhë nuk e vesh më, madje ka refuzuar edhe kërkesat për t`ju rikthyer punës në spital. Dëshiron që këto vite të pensionit t`i kalojë mes familjes dhe pasioneve të tij.
/abcnews.al/
