Kina ka kaluar projekt-ligjin kontrovers të sigurisë kombëtare për Hong Kong-un.
Projektligji u kalua në mënyrë unanime nga Komiteti i Përhershëm i Kongresit Popullor, që është organi më i lartë ligjvënës në vend, në një takim tre-ditor që filloi të dielën, sipas raportimeve të mediave në Hong Kong të cilat citojnë burime.
Drafti i ligjit nuk është bërë ende publik.
Sipas Pekinit ky ligj është i nevojshëm për t’u përballur me çështje të terrorizimit dhe të ndërhyrjes së jashtme, por kritikët thonë se do të dëbojë disidentët dhe do të shkatërrojë autonominë dhe liritë e premtuara kur territori iu kthye Kinës në vitin 1997.
Në konferencën e saj javore të mbajtur të martën, liderja e Hong Kong-ut Carrie Lam refuzoi që të bënte komente duke thënë se nuk do të ishte e përshtatshme.
Legji do të hyjë në fuqi kur të jetë publikuar në fletoren zyrtare në Hong Kong, duke anashkaluar ligjin e territorit gjysmë-autonom, dhe pritet të jetë në fuqi deri më 1 korrik, përvjetorin e kthimit të territorit nën sundimin kinez. /abcnews.al/
