Këshilli i Sigurimit të OKB, është mbledhur me kërkesë të Izraelit, pas sulmeve të Iranit kundër Izraelit. Sekretari i Përgjithshëm i OKB-së, Antonio Guterres, në hapje të seancës u shpreh: “Lindja e Mesme është në prag të konfliktit. Populli i rajonit po përballet me një rrezik real të një konflikti shkatërrues në shkallë të plotë. Tani është koha për të qetësuar dhe de-përshkallëzuar. Tani është koha për përmbajtje maksimale”, ka thënë Guterres.
Guterres u kujtoi anëtarëve se “karta e Kombeve të Bashkuara ndalon përdorimin e forcës kundër integritetit territorial ose pavarësisë politike të çdo shteti”.
Ai gjithashtu vuri në dukje se sulmet në ambientet diplomatike nuk lejohen.
“Ne kemi një përgjegjësi të përbashkët për të punuar për paqen,” deklaroi Guterres.
Ndërkohë Franca ka zbuluar se ishte e përfshirë në mbrojtjen ajrore të natës së kaluar pasi Irani sulmoi me rreth 300 raketa dhe drone në Izrael.
“Ne morëm përgjegjësitë tona…ne kryem misione përgjimi,” tha ministri i jashtëm Stephane Sejourne për kanalin televiziv France 2, pa dhënë detaje.
/abcnews.al/
