Loading ...
Nga Erisa Zykaj-Bruksel
Në kuadrin e konkluzioneve për politikën e zgjerimit, të 27 ministrat e çështjeve europiane të BE-së kanë aprovuar konkluzione lidhur me procesin e integrimit europian për Shqipërinë:
Këshilli mirëpret mbajtjen e konferencës së parë ndërqeveritare me Shqipërinë më 19 korrik 2022: një njohje e qartë e progresit të arritur nga Shqipëria në avancimin e agjendës së reformave të BE-së dhe në dhënien e rezultateve të prekshme dhe të qëndrueshme të reformës. Këshilli gjithashtu mirëpret që Komisioni tashmë ka avancuar punën e tij për të kryer procesin e shqyrtimit analitik të arritjes së deritanishme të BE-së (skrining) dhe pret përfundimin e këtij procesi.
Pas zgjedhjeve parlamentare në prill 2021, Këshilli nënvizon rëndësinë e autoriteteve për të vazhduar trajtimin e zbatimit të rekomandimeve të pazgjidhura të OSBE/ODIHR. Këshilli rikujton se dialogu politik gjithëpërfshirës dhe konstruktiv në vend mbetet thelbësor për të avancuar më tej me vrullin e reformave. Këshilli thekson nevojën për të garantuar transparencë në politikëbërje, gjithëpërfshirje të proceseve të konsultimit dhe komunikim efektiv të procesit të negociatave.
Këshilli mirëpret që Shqipëria ka bërë përparim në fushat themelore dhe veçanërisht në fushën e sundimit të ligjit, veçanërisht duke zbatuar reformën gjithëpërfshirëse në drejtësi, e cila ka përparuar në mënyrë të qëndrueshme, duke forcuar luftën kundër korrupsionit dhe krimit të organizuar. Struktura e Specializuar kundër korrupsionit dhe krimit të organizuar SPAK dhe Gjykata për Krimin e organizuar dha disa vendime të rëndësishme përfundimtare për zyrtarë të lartë shtetërorë. Përpjekjet për të krijuar një histori solide (gjurmë prove) në luftën kundër korrupsionit dhe krimit të organizuar duhet të intensifikohen, duke përfshirë edhe nivelin e lartë. Zbatimi i vendimeve të formës së prerë të Gjykatës mbetet thelbësor. Plani i veprimit për adresimin e rekomandimeve të Task Forcës së Veprimit Financiar duhet të zbatohet më tej.
Këshilli i bën thirrje Shqipërisë që të përmbahet nga vendosja e çdo skeme apo mase të tillë si legjislacioni i amnistisë tatimore që mund të rrezikojë ose dëmtojë përafrimin me arritejn e deritanishme legjislative dhe politikat e BE-së, duke përfshirë procedurat dhe masat e BE-së që synojnë parandalimin e pastrimit të parave dhe evazionit fiskal.
Këshilli mirëpret që procesi i Vetting (verifikimi i gjyqtarëve dhe prokurorëve) ka vazhduar të përparojë në mënyrë të qëndrueshme dhe ka prodhuar rezultate të prekshme. Këshilli mirëpret votimin e gjerë ndërmjet partive për zgjatjen e kufizuar në kohë të mandatit kushtetues të organeve të Vettingut dhe inkurajon autoritetet të sigurojnë përfundimin e rregullt të procesit në kohën më të shkurtër të mundshme. Këshilli përshëndet rikthimin e funksionalitetit të Gjykatës së Lartë dhe Gjykatës Kushtetuese.
Për të drejtat themelore, Këshilli bën thirrje për përpjekje të shtuara për të zbatuar një reformë gjithëpërfshirëse të sektorit të pronave dhe për të konsoliduar të drejtat e pronësisë në një mënyrë transparente, duke përfshirë mbajtjen e konsultimeve me të gjithë aktorët përkatës, duke përfshirë adresimin e rasteve të falsifikimit të dokumenteve dhe avancimin e shpejtë të procesi i regjistrimit dhe kompensimit.Pas miratimit të Ligjit për Regjistrimin e Popullsisë, Këshilli pret me padurim zhvillimin e qetë të regjistrimit në transparencë të plotë dhe në përputhje me standardet ndërkombëtare. Këshilli gjithashtu mirëpret miratimin e legjislacionit dytësor për minoritetet dhe vazhdon të nxisë Shqipërinë që të miratojë dhe zbatojë me shpejtësi aktet nënligjore të mbetura në lidhje me ligjin kuadër të vitit 2017 për mbrojtjen e pakicave kombëtare, në përputhje me standardet evropiane dhe me përfshirjen e të gjithë aktorët përkatës.
Për më tepër, Këshilli vazhdon t’i bëjë thirrje Shqipërisë që të bëjë përparim të prekshëm në lirinë e shprehjes. Këshilli rithekson rëndësinë e garantimit që çdo amendament në ligjin e medias të jetë në përputhje me rekomandimet e Komisionit të Venecias dhe standardet ndërkombëtare, nëse ligji shqyrtohet më tej nga parlamenti.
Këshilli vëren se është arritur progres i kufizuar në reformën e administratës publike dhe inkurajon Shqipërinë të vazhdojë me përpjekjet e vendosura në këtë fushë. Koordinimi brenda administratës publike ka nevojë për përmirësim, veçanërisht për integrimin e proceseve të planifikimit të politikave dhe buxhetimit. Krijimi i agjencive të reja duhet të jetë një proces gjithëpërfshirës dhe këto duhet t’i nënshtrohen kontrolleve dhe balancave.
Kur bëhet fjalë për migracionin, kuadri ligjor i Shqipërisë është kryesisht në përputhje me acquis të BE-së, por ka nevojë për përditësim. Numri i përgjithshëm i kërkesave të pabazuara për azil të paraqitura nga shtetasit shqiptarë në BE u rrit ndjeshëm në vitin 2021. Kjo duhet të monitorohet dhe trajtohet nga afër nga autoritetet shqiptare. Këshilli thekson nevojën që Shqipëria të përmbushë angazhimin e saj për të përafruar me politikën e vizave të BE-së.
Për reformat ekonomike, Këshilli inkurajon Shqipërinë të vazhdojë përpjekjet për të përmbushur më tej kërkesat e tregut të brendshëm të BE-së dhe për të përballuar presionin konkurrues dhe forcat e tregut brenda Bashkimit. Këshilli mirëpret angazhimin e vazhdueshëm konstruktiv të Shqipërisë në bashkëpunimin rajonal. Këshilli mirëpret gjithashtu vazhdimin e dialogut nga Shqipëria për të siguruar marrëdhënie të mira fqinjësore, të cilat mbeten thelbësore.
Këshilli e përgëzon fuqishëm Shqipërinë për bashkëpunimin e saj të qëndrueshëm në çështjet e politikës së jashtme dhe në veçanti përafrimin e plotë me politikën e përbashkët të jashtme dhe të sigurisë të BE-së, duke përfshirë masat kufizuese të BE-së – një sinjal i fortë i angazhimit strategjik të Shqipërisë në rrugën e saj drejt BE-së. Ai mirëpret gjithashtu pjesëmarrjen e vazhdueshme aktive të Shqipërisë në misionet dhe operacionet e BE-së në kuadër të politikës së përbashkët të sigurisë dhe mbrojtjes. Këshilli vlerëson Shqipërinë për angazhimin e saj aktiv si një anëtare jo e përhershme në Këshillin e Sigurimit të OKB-së në promovimin dhe mbrojtjen e rendit ndërkombëtar të bazuar në rregulla. /abcnews.al
