Loading ...
Studentët shqiptarë në Shkup zhvillojnë protestë ditën e sotme. Protesta nis në orën 12:30 nga qendra e Shkupit, me destinacion final ministrinë e Drejtësisë.
Studentët shprehen se Gjuha shqipe nuk mund të mbahet peng nga vullneti dhe interpretimi i ministrave, ndërsa u bëjnë thirrje qytetarëve pa dallime politike t’i përkrahin studentët.
Ata e kanë një apel edhe për partitë politike që të mos e politizojnë kauzën e studentëve, por t’i ofrojnë atyre zgjidhje reale.
Çështja e provimit të jurisprudencës në gjuhën shqipe është kthyer në një çështje publike muajt e fundit, pasi 385 studentë shqiptarë nga tre fakultete të juridikut në Maqedoninë e Veriut përmes një peticioni kërkuan nga institucionet që provimi i jurisprudencës të jepet edhe në gjuhën shqipe, gjuhë në të cilën kanë kryer edhe studimet.
Ministria e Drejtësisë me në krye Igor Fillov vazhdimisht ka insistuar se provimi i jurisprudencës nuk mund të mbahet në gjuhën shqipe pavarësisht Ligjit për përdorimin e gjuhëve.
Kryeministri Hristijan Mickoski edhe pse ka deklaruar se studentëve duhet t’u mundësohet provimi edhe në shqip, nuk ka marrë masa konkrete për këtë çështje.
