TIRANË- Apeli i Gjykatës së Posaçme ka lënë në fuqi vendimin e shkallës së parë për sekuestron e pasurisë së ish-zv kryeministrit Arben Ahmetaj.
Nga arratia, nëpërmjet avokatit të tij, Ahmetaj kërkoi në Apel kthimin e apartamentit në zonën e Shallvareve në Tiranë që iu sekuestrua nga SPAK, në kuadër të hetimeve që po kryen për 3 vepra penale.
Pak javë më parë, me vendim të gjykatës dhe kërkesë të SPAK, Ahmetajt iu vunë në sekuestro edhe 6 pasuri, 4 apartamente dhe 2 llogari bankare në shumën e 124 300 euro.
Ndaj Ahmetajt ka një urdhër-arresti ndërkombëtar me masë dhënë në mungesë “Arrest në burg” për veprat penale: “Korrupsion”, “pastrim parash” dhe “fshehje pasurie”.
Ish-zv kryeministri u vu nën hetim nga SPAK si i përfshirë në çështjen e inceenratorëve. Sipas SPAK, Ahmetaj ka përfituar prona dhe shuma monetare në 6 episode të faktuara nga biznesmenët Klodian Zoto dhe Mirel Mërtiri. Më 14 korrik Kuvendi votoi heqjen e imunitetit për Arben Ahmetajn, duke miratuar kërkesën e SPAK për arrestimin e tij./ abcnews.al
