Katër gazetarë rusë janë dënuar nga një gjykatë në Moskë me nga 5 vjet e gjysmë burgim secili për lidhje me Fondacionin Kundër Korrupsionit (FBK) të udhëheqësit opozitar të ndjerë, Aleksei Navalnyt. Autoritetet ruse e kanë shpallur këtë Fondacion “organizatë ekstremiste”.
Gazetarët — Antonina Favorskaya, Sergei Karelin, Konstantin Gabov dhe Artyom Kriger — u shpallën fajtorë pas një gjykimi të mbyllur për publikun, për kontributet e tyre në kanale në YouTube të lidhura me FBK-në përpara se ajo të ndalohej në vitin 2021.
Gjykata më 15 prill ua ndaloi gjithashtu të pandehurve të punojnë si gazetarë për tre vjet pas lirimit të tyre nga burgu.
Pas shpalljes së vendimit dhe dënimeve, mbështetësit e gazetarëve filluan të duartrokasin dhe të thërrasin: “Jeni më të mirët!”
Kriger u tha mbështetësve të tij se “gjithçka do të jetë në rregull, mos u shqetësoni, herët apo më vonë e gjitha kjo do të përfundojë. Ata që më dënuan mua, me siguri do të dënohen vetë”.
Të katër gazetarët kanë mohuar vazhdimisht akuzat e ngritura ndaj tyre.
