Altin Sulku është një ndër artistët më në zë në tregun muzikor shqiptar, me një karrierë 20 vjeçare. I ftuar këtë të mërkurë në emisionin “Abc-ja e mëngjesit”, Sulku u pyet nga moderatori Alban Musa për bashkëpunimin më të mirë, të cilin e ka shijuar në maksimum.
Ai vlerësoi duetin me Noizyn, suksesi i të cilit i dha një ndryshim rrënjësor në karrierë. “Dihet që me Noizyn më kanë shijuar jashtë mase. Kam parë ndryshimin në karrierë 100 përqind. Pata një pauzë dhe në 2014-ën u riktheva me Noizyn. Aty pashë tamam katapultimin. Në moment që doli klipi, pashë reagimin e të rinjve.
Ndryshoi dhe muzika shumë, nga popullore u bë shumë moderne. Ka shumë kolegë që nuk iu ka shkuar shumë përshtat, jam munduar t’i përshtatem dhe rrymave të tjera. Desh fati më shkuan dhe këta modernet. Ishte problem me Noizyn se nuk doja t’i prishja punë, se ishte faqe tjetër. Aty ndryshuan shumë gjëra.”, u shpreh Sulku. /abcnews.al
