Kandidati që ka të ngjarë të përfaqësojë partinë në pushtet në zgjedhjet e ardhshme presidenciale të Tajvanit, nënpresidenti William Lai, u zotua të mërkurën se do të mbrojë ishullin kundër Kinës dhe të sigurojë paqen, pasi u regjistrua zyrtarisht për të kandiduar në fushatë.
Lai është pretendenti kryesor për të qenë kandidati i Partisë Demokratike Progresive (DPP) në zgjedhjet presidenciale të vitit të ardhshëm, shkruan Reuters.
Ai mori kryesimin e DPP-së në janar të këtij viti pasi presidentja Tsai Ing-wen dha dorëheqjen si kryetare në nëntor pas mposhtjes në zgjedhjet lokale. Tsai nuk mund të kandidojë sërish si presidente për shkak të kufizimeve të mandatit kushtetues.
Duke folur në selinë e partisë ndërsa regjistrohej për të kandiduar si kandidat i partisë në zgjedhjet e saj paraprake, Lai tha se Tajvani qëndronte në vijën e parë të demokracisë.
“Tajvani është në një pozicion kyç gjeografik në zinxhirin e parë ishullor të Indo-Paqësorit, duke u përballur drejtpërdrejt me kërcënimet verbale dhe ushtarake të Kinës, shtypjen diplomatike përmes mjeteve të paskrupullta dhe kërcënimet e ndryshme të strategjisë së tyre të dyfishtë për të kërkuar paqe dhe për të luajtur luftë,” theksoi ai./abcnews.al
