Kamionistët e Malit të Zi në protestë, preket edhe Shqipëria/ Nga e marta s’do lejohet qarkullimi i mjeteve të tonazhit të rëndë për 72 orë

HANI I HOTIT- Autoritetet malazeze kanë njoftuar zhvillimin e një proteste nga Shoqata e Kamionistëve të Republikës së Malit të Zi, e cila do të nisë të martën në orën 09:30 dhe do të zgjasë për 72 orë.

Si pasojë e kësaj proteste dhe për të garantuar sigurinë rrugore, do të ndalohet qarkullimi i mjeteve të tonazhit të rëndë nga Shqipëria drejt Malit të Zi deri në përfundim të saj.

Gjatë kësaj periudhe, në rrugët që çojnë drejt pikave kufitare do të lejohen të kalojnë vetëm automjetet e vogla, mjetet e emergjencës, autobusët dhe transporti i pasagjerëve.

Policia Kufitare u ka bërë thirrje drejtuesve të mjeteve të rënda të respektojnë këtë kufizim të përkohshëm, për të shmangur bllokimet dhe incidentet e mundshme gjatë zhvillimit të protestës./abcnews.al