“Ka luftu për mu, për ty…për neve”, Ledri Vula emocionon me fjalët për ish-ushtarin e UÇK-së

Ledri Vula ka ndarë me ndjekësit e tij në rrjete sociale një video emocionuese të ish-ushtarit të UÇK-së, Avni Kastrati teksa rrëfen përjetimet e tij për luftën. Krahas videos, Ledri ka shkruar dhe disa fjalë domëthënëse ku shprehet se Kastrati është në mesin e shumë të tjerëve që kanë luftuar për çlirimin e vendit.

Ndër të tjera, reperi shton se Avniu “ka luftu për mu, për ty për atë…ka luftu për neve.” Videoja e ndarë nga reperi është projekt i “LIRIA KA EMËR”.

“Avniu 18 vjeç në vend se me dal me shku në fakultet, ose me dal me dosta, ose me dal deri në Prishtinë, ose me u gëzu për sukses të dostave, ai e ka kap pushkën që sot 18-vjeçarët me shku në fakultet në gjuhë të vet, me pi kafe me dosta pa frikë se i vjen dikush nga mbrapa, me shku kah të duan pa frikë se i ndal policia në postbllok.

E ka kap pushkën që dosti dostin mos me pa të vramë as të plagosun vetëm pse është shqiptar. Avniu është vetëm një frymë prej shumë frymëve që kanë luftu për lirinë e vendit të vet. Ka luftu për mu, për ty, për atë…ka luftu për neve…#LiriaKaEmer”, ka shkruar Ledri Vula.

Në video, Avniu tregon se i është bashkuar UÇK-së në moshën 18-vjeçare për të luftuar për çlirimin e Kosovës. “Kur përmend UÇK-ja është një fjalë ma krenare e shpirtit tem”, shprehet ai. /abcnews.al

Mos rri jashtë: bashkohu me ABC News. Ne jemi kudo!