Victoria Beckham zbuloi disa sekrete gjatë daljes së fundit së bashku me ‘make up’ artisten e njohur Charlotte Tilbury, ku foli për bukurinë, pamjen e saj dhe “versionin më të mirë të vetes”. Biseda mes dy femrave dhe biznesmeneve të famshme shkoi edhe tek operacioni plastik, ku Beckham mohoi se kishte bërë operacion plastik në hundë, u hap para publikut për implantet e gjoksit dhe gjithashtu foli se si e percepton bukurinë sot.
Në videon “In Conversation With Victoria Beckham: Beauty Gifting Secrets”, Tilbury pranon se është akuzuar shumë herë për operacione plastike në hundë, gjë që nuk është e vërtetë dhe në fakt është grim. Kur grimerja e njohur komenton se njerëzit e pyesin shpesh nëse ka bërë një “punë hundësh” që nga konturimi i hundës, Beckham përgjigjet se e kupton plotësisht:
“Ata thonë gjithashtu se kam bërë operacion plastik në hundën time”, tha Victoria. “Unë kurrë nuk kam bërë ndërhyrje në hundë. Gjithmonë kam pasur një hundë të tillë. Është truku i grimit”, shtoi ajo.
Megjithatë, në vitin 2017, Victoria Beckham foli për implantet e saj të gjoksit kur shkroi një letër të hapur për veten e saj 18-vjeçare për British Vogue.
“Me siguri duhet të them, mos u shqetësoni për gjoksin tuaj”, ka shkruar ajo. “Gjithë këto vite isha një budallaqe. Një shenjë e pasigurisë. Thjesht shijoni atë që keni.”
Sa i përket qëndrimit të saj për bukurinë në të 40-at, ajo tha se është e rëndësishme të mos përpiqesh të jesh dikush që nuk je.
“Unë nuk mendoj se kujdesi për lëkurën ka të bëjë me përpjekjen për t’u dukur më i ri. Bëhet fjalë për t’u dukur versioni më i mirë i vetes dhe për të përqafuar atë që jeni dhe për t’u dukur magjepsëse dhe e mrekullueshme”, përfundoi Beckham, duke dërguar një mesazh vërtet pozitiv dhe kuptimplotë se si duhet ta perceptojmë bukurinë dhe pamjen tonë./abcnews.al
