Përparësia e presidentit të zgjedhur amerikan Joe Biden do të jetë pandemia e koronavirusit, raporton BBC.
Sipas ekipit, Biden do t’u kërkojë gjithë amerikanëve të mbajnë maska. Të hënën, Biden pritet të emërojë task forcën për trajtimin e situatës së koronavirusit, e cila përbëhet nga 12 anëtarë.
Fitorja e tij mbetet një parashikim ndërsa shtetet kryesore vazhdojnë ende të numërojnë votat. Ndërkohë, Trump nga ana tjetër nuk pranon humbjen.
Trump ka nisur sfida ligjore për rezultatet në disa shtete kryesore. Ai ka bërë pretendime të pabazuara për mashtrim elektoral, por zyrtarët e zgjedhjeve kanë deklaruar se nuk ka prova se zgjedhjet janë manipuluar.
Biden po vazhdon me planet e tij për të marrë pushtetin në janar. Kjo gjithashtu përfshin një mori urdhrash ekzekutivë – urdhra me shkrim të lëshuar nga presidenti për qeverinë federale që nuk kërkojnë miratimin e kongresit – që synojnë përmbysjen e politikave të diskutueshme të Trump.
Sipas mediave amerikane:
-Biden do t’i bashkohet marrëveshjes së Parisit për klimën, të cilën SHBA-ja u largua zyrtarisht të mërkurën
-Ai do të ndryshojë vendimin për t’u tërhequr nga Organizata Botërore e Shëndetësisë
-Ai do t’i japë fund ndalimit të udhëtimeve për shtetas nga shtatë vende kryesisht myslimane
-Ai do të rivendosë një politikë të epokës së Obamës për dhënien e statusit të imigracionit emigrantëve pa dokumenta që hynë në SHBA.
Në fjalimin e tij të parë si president i zgjedhur, Biden tha se ishte “koha për të shëruar” SHBA-në dhe u zotua “se do të bashkojë” vendin. Duke iu drejtuar mbështetësve të Trump, ai tha: “Ne nuk duhet t’i trajtojmë kundërshtarët tanë si armiq”.
Ai dhe nënkryetarja e zgjedhur Kamala Harris kanë filluar të punojnë për tranzicionin , duke thënë se ekipi do të përqendrohet gjithashtu në ekonominë, racizmin dhe ndryshimin e klimës.
Rezultati i parashikuar i zgjedhjeve do të thotë që Trump bëhet presidenti i parë me një mandat që nga vitet 1990.
Ndërkohë, Administrata e Shërbimeve të Përgjithshme, një agjenci qeveritare e ngarkuar me njohjen e presidentit të zgjedhur dhe fillimin e procesit të tranzicionit, deri më tani nuk e ka bërë këtë, transmeton abcnews.al
Administratorja e saj Emily Murphy, i cili u emërua nga Trump, nuk ka dhënë asnjë shenjë se kur mund të ndodhë kjo. Deri atëherë, ekipi i tranzicionit të Biden nuk mund të ketë qasje në fondet qeveritare ose të komunikojë me agjencitë federale.
Raportet e mediave sugjeruan se republikanët në moshë të vjetër mbetën të ndarë në lidhje me mënyrën e reagimit ndaj fitores së Biden, me disa që refuzuan të pranonin publikisht rezultatin e zgjedhjeve.
Udhëheqësi republikan në Dhomën e Përfaqësuesve, Kevin McCarthy, tha për Fox News se të gjitha rinumërimet dhe sfidat ligjore duhet të përfundojnë, duke shtuar: “Atëherë dhe vetëm atëherë, Amerika do të vendosë se kush fitoi garën.”
Por ish-Presidenti republikan George W Bush e përgëzoi Biden për fitoren e tij, duke thënë se populli Amerikan duhet të kishte besim se zgjedhjet kishin qenë të drejta dhe se rezultati i tyre ishte i qartë. Ai gjithashtu e përgëzoi Trump për fushatën e fortë që zhvilloi.
Cili është plani i Joe Biden për trajtimin e pandemisë?
Presidenti i zgjedhur ka premtuar një ndryshim të madh në mënyrën se si Shtëpia e Bardhë do të trajtojë koronavirusin pasi minimizimit nga ana e Trump, i cili nuk rekomandoi respektimin e masave të shëndetit publik duke përfshirë maskat dhe distancimin social.
Ekipi i Biden ka thënë se do të bëjë të mundur që të gjithë amerikanët të kenë qasje në testime të rregullta dhe falas dhe do të sigurojë “udhëzime të qarta, të bazuara në prova”. Task forca do të drejtohet nga ish-gjenerali kirurg Vivek Murthy dhe një ish-komisioner i Administratës së Ushqimit dhe Barnave, David Kessler.
Biden gjithashtu dëshiron që maska të bëhet e detyrueshme në të gjithë vendin, gjë që do të shpëtonte mijëra jetë sipas tij. Ai planifikon t’i bëjë thirrje çdo amerikani që të mbajë maskën. Presidenti i zgjedhur është shfaqur gjithmonë me maskë në daljet e tij publike ndërsa Trump e ka shmangur atë.
Numri i rasteve është rritur në 100,000 të dielën për të pestën ditë radhazi ndërsa më shumë se 237,000 amerikanë kanë vdekur. Në fillim të këtij muaji, eksperti amerikan Anthony Fauci tha se SHBA-ja “nuk mund të tregonte qasje më të dobët se kaq” ndërsa vendi po i afrohet sezonit të dimrit dhe njerëzit do të kalojnë më shumë kohë në ambiente të mbyllura se sa jashtë.
Biden gjithashtu ka deklaruar se pika tjetër e tij do të fokusohet te ekonomia amerikane e prekur nga virusi, e cila ka lënë miliona amerikanë të papunë. Biden ka premtuar se do të rrisë prodhimin, do të investojë në infrastrukturë, dhe do të zvogëlojë hendekun e pasurisë midis grupeve të ndryshme etnike.
Si do të trajtojë Biden ‘racizmin sistemik’?
Në krahasim me Trump, i cili është akuzuar se ka nxitur tensionet racore dhe pas dështimit ku nuk dënoi grupet supremaciste, Biden synon që tema e racizmit të jetë një shtyllë kryesore e administratës së tij.
Ai kërkon të vendosë masa që ndihmojnë komunitetet me ngjyrë dhe pakicat, duke i trajtuar njësoj si njerëzit me ngjyrë edhe të bardhët duke zvogëluar kështu pabarazitë racore.
Biden gjithashtu dëshiron të reformojë policinë amerikane duke ndaluar përdorimin e chokeholds(goditjes në fyt), duke ndaluar “armët e luftës” në forcat e policisë dhe duke krijuar një komision kombëtar të mbikëqyrjes së policisë.
Ai gjithashtu planifikon të zvogëlojë numrin e të burgosurve në burgjet e SHBA-së, e cila ka më shumë se dy milion njerëz dhe është më e madhja në botë dhe përfshin një numër disproporcional të të burgosurve me ngjyrë , transmeton abcnews.al
“Sistemi ynë i drejtësisë penale nuk mund të jetë kurrë i drejtë nëse nuk çrrënjosim pabarazitë racore, gjinore të bazuara në sistem,” sipas plani të Biden.
Shtetet e Bashkuara janë tronditur nga protestat kundër brutalitetit të policisë në prag të zgjedhjeve. Pamjet e vdekjes së George Floyd në paraburgimin e policisë në Minneapolis në maj shkaktuan zemërim në të gjithë botën dhe rezultatet e sondazhit treguan se pabarazia racore ishte faktori i dytë më i madh që përcaktonte se si njerëzit votuan pas ekonomisë.
Cilat janë planet e Trump?
Presidenti Trump do të mbajë një seri tubimesh në të gjithë vendin për të marrë mbështetjen e duhur që i duhet në sfidat ligjore, ka cituar zëdhënësi i fushatës, Tim Murtaugh.
BBC deklaroi fitoren e Biden të shtunën pasi fitoi në vendet kryesore të betejës në Pensilvani dhe Nevada, duke fituar mbi 270 vota elektorale që i duhen për të fituar presidencën.
Trump nuk ka folur në publik që pas rezultateve por ai ka thënë vazhdimisht se këto votime janë të manipuluara.
Pasi u parashikua fitorja e Biden, Trump deklaroi se ky i fundit”po e deklaronte veten si fitues” duke këmbëngulur që numërimi i votave nuk kishte përfunduar. Presidenti mori më shumë se 70 milion vota, numri i dytë më i lartë në histori.
Trump është zotuar të kontestojë rezultatet e zgjedhjeve në disa fronte. Një rinumërim do të mbahet në Geogia dhe Trump dëshiron të njëjtën gjë në Wisconsin, por rinumërimet rrallë ndryshojnë rezultatet.
Nëse rezultati i zgjedhjeve kontestohet, kjo do të thotë që ekipet ligjore do ta kundërshtojnë këtë në gjykatat e shtetit. Gjykatësit e shtetit do të duhet të mbështesin sfidën ligjore dhe të urdhërojnë një rinumërim, dhe atëherë gjyqtarëve të gjykatës së lartë mund t’u kërkohet të vendosin fituesin.
Fushata Trump ka nisur një proces gjyqësor mbi fletët e votimit në Arizona për të cilat pretendon se nuk janë numëruar të gjitha.
Çfarë do të ndodhë më pas?
Votat në disa shtete po vazhdojnë të numërohen dhe rezultatet nuk do të jenë kurrë zyrtare deri në përfundimin e saktë të numërimit.
Kjo duhet të bëhet përpara se 538 zyrtarë (zgjedhës) të zgjedhur nga Kolegji Zgjedhor – i cili vendos zyrtarisht kush fiton zgjedhjet – të takohen në kryeqytetet e tyre për të votuar në 14 dhjetor.
Votat e zgjedhësve zakonisht pasqyrojnë votën popullore në secilin shtet. Sidoqoftë, në disa shtete kjo nuk është një kërkesë zyrtare. Presidenti i ri do të marrë zyrtarisht detyrën në 20 janar pas një periudhe tranzicioni që nevojitet për të caktuar ministrat e kabinetit.
Dorëzimi i pushtetit bëhet në një ceremoni, e cila mbahet në shkallët e ndërtesës së Kapitolit në Uashington. Përktheu Sonila Backa/abcnews.al
