Superiorja merr stafetën menjëherë, pas përcaktimit të gjysmëfinaleve të Kupës së Shqipërisë. Java e 25-të ka në program vetëm finale, për kreun dhe mbijetesën.
Partizani-Teuta veçohet nga të tjerat dhe do të luhet të dielën prej orës 16:00, në stadiumin “Elbasan Arena”. Të kuqtë, me inatin e eliminimit nga Kupa dhe lidhjen e akumuluar në 120 minuta, do tentojnë të mposhtin durrsakët rivalë për titull.
Për t’u parë edhe dueli i Laçit kryesues në shtëpi. Skuadra e Shpëtim Duros duhet të rigjenerojë energjitë dhe të parballet me Tiranën e “plagosur” në derbi, por të freskët fizikisht. Bardheblutë kanë fituar edhe më parë në Laç, ndaj pritet një duel i fortë.
Vllaznia tani luan në transfertë, kundër Kastriotit që ndali javën e shkuar Teutën. Krutanët duan të sigurojnë mbijetesën sa më shpejt, kurse Vllaznia të rikthehet te fitorja që mungon prej javësh.
Bylisi, pas fitores në Shkodër, do tentojë të mundë në Ballsh Kukësin e “trullosur” nga eliminimi në Kupën e Shqipërisë. Këtë javë luhet edhe një finale mbijetese, mes Apolonisë dhe Skënderbeut. Barazimi nuk vlen për asnjërën skuadër, nisur nga diferenca me Bylisin e vendit të tetë. / abcnews.al
