SHQIPËRI- Jared Kushner, dhëndri i presidentit amerikan Donald Trump pak ditë më parë foli përmes një videomesazhi për resortin që do të ndërtojë në Ishullin e Sazanit në Shqipëri.
Gjatë fjalës së tij, në forumin e investimeve që u mbajt Tiranë, Kushner tha se janë angazhuar inxhinierët më të mirë në Europë për të ruajtur mjedisin.
Marinela Jazoj, nga Shoqata e Investitorëve të huaj në Shqipëri u shpreh se vendit tonë i duhen më shumë investitorë të huaj, pasi projektet që ato sjellin krahas kapitalit financiar sjellin dhe një tjetër kulturë pune.
“Kur dëgjoj për investime të tilla apo interesa të tillë më gëzon zemra, sepse jam rritur ne Sazanin përballë. Deri më sot kemi parë Sazanin një ishull me Gjelbërim dhe asgjë tjetër dhe duke punuar me komunitetin e huaj të biznesit, me investitorë të huaj, unë me 100% do isha gjithmonë për investitor të huaj, që të zhvillonin vendi tonë dhe duke qenë se standardi dhe kapitali qoftë financiar dhe qoftë njerëzor janë të një niveli tjetër.
Kur flasim për një investitor të përmasave të tilla nuk besoj se do kishte ndonjë vend, i cili nuk do ishte i entuziazmuar. Ndërtimi i Aeroportit të Vlorës, që është në fund të vet është një nga elementët kryesor. mendoj se vendi ynë”, theksoi ai.
Reinaldo Pipiria, drejtor i kompanisë Narea, tha se investimi i dhëndrit të Trump përçon mesazhin se Shqipëria është vend i sigurt dhe me mundësi për të zhvilluar turizmin elitar.
“Përfitimet për shkak të Kushner në Shqipëri mendoj se kanë filluar të jenë. Promovimi i Kushner është promovim për Shqipërinë. në një moment kur kemi një investim amerikan, patjetër që është një sinjal dhe një angazhim dhe stabilitet politik dhe ekonomik në vend. Sikur asgjë tjetër të mos ndodhi. vetëm ky investim, është mjaftueshëm për garancinë se këtu do ketë stabiliteti ekonomik dhe politik për shkak se ka një lloj…Ekonomia politike funksionon kështu, ka një nuhatje që aty ku janë investimet e Amerikës janë zona të sigurta.
Në një moment që kemi këto lloj investimesh, Shqipëria automatikisht e ka ngritur veten në një tjetër pjacë, nuk është më Shqipëria e pallateve të Golemit, por po flasim për një turizëm elitar që sjell kapitale të freskëta në Shqipëri”, tha ai.
Menaxher i Horwath HTL, Majlind Lazimi, e cilësoi projektin e Jared Kushner si projekt magnet për sektorin e turizmit në vendin tonë.
“Ky është një projekt tipi projekt magnet. Kjo ia rrit vizibilitetin e Shqipërisë si destinacioni turistik. Kushner me fondin e investimeve që ka, ka dhe aksionerë nga Lindja e Mese, një nga to është dhe Fondi Saudit. Kështu që unë besoj është një moment ndodhsha i fundit për Shqipërinë për të rivitalizuar Sazanin si një rajon ekomomik. Ka pasur disa tentativa që në kohën e Nanos, edhe Berisha ka tentuar në fakt. Projekt i rëndësishëm”. tha ai.
Zëvendësministri për Evropën dhe Punët e Jashtme, Endrit Yzeiraj në një intervistë në emisionin “Sheshi i Dollarit” në ABC News theksoi se projekti për Sazanin do të ndikojë në rritjen e turistëve.
“Ajo që Shqipëria ka nevojë që të zhvillojë është përmirësimi i ofertës turistike në mënyrë që të tërheqë të pasur, turistë që vijnë dhe shpenzojnë më shumë në vend.
Jo vetëm ata turistë që vijnë për të eksploruar vendin me çantë në kurriz, që patjetër mbetet një nga turistët e rëndësishme që vizitojnë zonat malore dhe duhet në fakt që të vijnë dhe ta vizitojnë vendin dhe të jenë të mikpritur në vend, por kemi nevojën për të thithur turistë që shpenzojnë më shumë, ku duhet që të jetë dhe qëllimi, për këtë arsye unë mendoj që do të jetë dhe një sërë investitorësh të mëdhenj dhe të rëndësishëm në Shqipëri në fushën e turizmit.
Por, siç e përmenda Shqipëria synon që të jetë më shumë se kaq.
Turizmi është një portë hyrëse në një vend, ajo çka ne shpresojmë dhe duam të zhvillojmë është aftësia e investitorë për të investuar në fusha të tjera kur e kanë njohur Shqipërinë.
Pra shpresojmë që turizmi të jetë mënyra se si individë të ndryshëm vijnë dhe vizitojnë Shqipërinë fillimisht për t’u argëtuar, por që më pas kuptojnë se nuk është një vend vetëm për të pushuar 2-3, por dhe për investuar”, tha ai./abcnews.al
