“Dardanët” e Kosovës arritën një fitore spektakolare, mbrëmjen e së enjtes, që sapo lamë pas, teksa mundën në transfertë me rezultatin e pastër, 3 me 0, përfaqësuesen e Andorrës, në përballjen e vlefshme për kualifikueset e Kampionatit Evropian të futbollit, Euro 2024.
Padyshim, protagonist absolut i kësaj fitoreje ishte “ylli” i Besiktas, Milot Rashica, i cili shënoi një dopietë në minutat 26’ dhe 71’ të sfidës. Pas ndeshjes, “fantazisti” 27-vjeçar u shpreh i lumtur për golat, si dhe për fitoren e parë në kualifikueset e Euro 2024.
“Jam i lumtur për golat dhe fitoren. Ishte një fitore e mirë, pasi është e para. Po ashtu, ishte një rast i mirë për të provuar disa lojtarë të rinj, duke e pasur parasysh situatën në grup. Mendoj se shumica kanë treguar paraqitje të mirë dhe e kanë dhënë maksimumin në këtë ndeshje”,- u shpreh “ylli” i “dardanëve” pas ndeshjes. /i.m /abcnews.al
