“ABC” zbulon detaje të reja nga eksplozivi që iu vendos poshtë makinës 35-vjeçarit nga Vlora, Sokol Binaj, që fatmirësisht nuk shpërtheu. Një burim i tha gazetarit Elton Nikaj, se eksplozivi, 600 gr ishte mbështjellë bashkë me një telefon celular.
Qëllimi i autorit ishte për ta shpërthyer në distancë bombën me telekomandë, por fatmirësisht një gjë e tillë nuk ndodhi, pasi pakoja u pikas nga pronari i “ML”-së dhe u çaktivizua nga ekspertët e xhenios.
35-vjeçari deklaroi në polici se nuk ka konflikte. “Nuk kam konflikte me asnjë person. Nuk e di cili mund ta ketë vendosur eksplozivin” mësohet se është shprehur Binaj, raporton gazetari i “ABC”-së në Vlorë, Elton Nikaj. Ai nuk është i skeduar nga policia për ngjarje të mëparshme, ndërsa kishte dy vite që ishte kthyer nga jashtë shtetit.
Por si e pikasi ai eksplozivin?
Binaj rreth orës 01:30 kur është kthyer në shtëpi me një tjetër makinë ka vënë re diçka të dyshimtë poshtë “ML”-së së tij në pjesën e përparme, që ishte e parkuar. Vlonjati është afruar dhe ka parë që ishte një pako e dyshimtë.
Në atë moment ai lajmëron policinë, e cila rrethon zonën dhe njofton ekspertët e xhenios nga Tirana që vijnë dhe në orën 03:30 bëjnë shpërthimin e kontrolluar të eksplozivit.
Policia ka nisur hetimet për të shkuar në gjurmët e autorëve. Por puna nuk do të jetë e lehtë, pasi zona ku kishte parkuar makinën poshtë shtëpisë është në periferi të qytetit dhe nuk ka kamera sigurie./ db/Abcnews.al
