Goditja në zemër i ndërpret xhiron e mbrëmjes me bashkëshorten në Pedonalen e qytetit. 38-vjeçari bie pa ndjenja në rrugë, tmerrohen qytetarët dhe kërkojnë ta përmendin deri në mbërritjen e ambulancës.
Banorët e Beratit janë tronditur mbrëmjen e sotme nga një ngjarje që ka ndodhur pak minuta më parë në Pedonalen e qytetit, që përdoret për xhirot e mbrëmjes së qytetarëve. Një 38-vjeçar,që ka qenë duke shëtitur me bashkëshorten e tij, ka rënë papritur pa ndjenja në tokë, duke tmerruar të gjithë qytetarët. Të ndodhur në xhiro por edhe në baret përreth, banorët janë ngritur për ti dhënë ndihmën e parë, duke njoftuar edhe Spitalin e Beratit.
Adem Agalliu ka qëndruar disa minuta pa reaguar në rrugë, ndërkohë që qytetarët përpiqeshin ta përmendnin me mjete rrethanore deri në mbërritjen e ekipit të ndihmës së shpejtë të Repartit të Urgjencës.
Stafi mjekësor e ka marrë të riun me barrelë dhe e ka transportuar drejt Spitalit Rajonal Berat.
Burimet spitalore bëjnë me dije se,38-vjeçari mbërriti në Repartin e Urgjencës me probleme kardiake.
Sipas mjekëve, pas ekzaminimeve të kryera ka Agalliu ka rezultuar me ndryshime të EKG dhe gjendja e tij është ende e pastabilizuar.
Mjekët janē duke e reanimuar Agalliun, që mendohet se ka kaluar një parainfarkt.
