Një 38-vjeçar shqiptar është dënuar nga gjykata belge e Apelit me 2 vite burg shtesë për pjesëmarrjen e tij në një bandë e cila kontrabandonte njerëz.
Ai ishte dënuar më parë me 8 vjet burg për të njëjtën akuzë. Hetimet filluan në vitin 2016, kur organet belge të drejtësisë ranë në gjurmët e bandës në zonën industrial në Veurne.
Sipas Prokurorisë, kjo bandë ishte përgjegjëse për 39 kalime kontrabandë drejt Mbretërisë së Bashkuar në një periudhë prej 5 muajsh. Në total, 150 persona kishin kaluar kufirin në mënyrë të paligjshme.
Baza e tyre operative ishte ish-hoteli i Formula 1 në Ghent, por makinat niseshin nga parkingjet në Veurne, Adinkerke dhe Bruges. Për çdo person të kontrabanduar u kërkuan 12,000 £.
Në korrik 2018, pesë shqiptarë u dënuan për këtë rast. Astrid R. 38 vjeç u dënua me tetë vjet burg. Ai u arrestua në Mbretërinë e Bashkuar në vjeshtën e vitit 2019 dhe u ekstradua në Belgjikë, shkruajnë mediet belge.
Në një dosje tjetër të kontrabandës së qenieve njerëzore në vitin 2019, shqiptari rezultonte i dënuar edhe me tetë vjet burg. Ai punonte si shofer taksie dhe më vonë si organizator i bandës dhe drejtues i saj.
Por avokatët e tij thanë se dënimi me 8 vite ishte i mjaftueshëm. Megjithatë, prokurori i përgjithshëm ishte i bindur se shqiptari duhej të dënohej edhe me 2 vite shtesë. Përfundimisht, Gjykata vendosi t’i caktojë atij dy vjet shtesë, duke e çuar dënimin e tij total me burg në dhjetë vjet. Ai është dënuar edhe me 968 mijë euro gjobë./abcnews.al/
