Uji nuk është shkaku i helmimit masiv të banorëve në Bulqizë. Instituti Shendetit Publik ka dalë në këtë konkluzion pasi ka përfunduar analizat e mostrave të marra në këtë qytet.
“Në përfundim të të gjitha ekzaminimeve të kampioneve të ujit të marrë në qytetin e Bulqizës, rezultatet aktuale për treguesit fiziko-kimikë, metale të rënda dhe bakterologjike janë negative“, tha specialistja e ISHP, Shkëlqime Poga.
Rreth dy javë nga helmimi i 120 personave në lagjen e vjetër të Bulqizës shkaku vijon të mbetet mister. Specialistët e shëndetit publik dyshimet e para i hodhën mbi ujin dhe i bën thirrje qytetarëve të mos e konsumojnë atë.
Ky dyshim bie poshtë ndërkohë banorët vijojnë të mos e përdorin ujin që iu shkon nga rrjeti pasi Instituti i Shëndetit Publik nuk ja ka dërguar ende përgjigjen zyrtare Drejtorisë së Shëndetit Publik në Bulqizë e cila vijon të mbajë në fuqi vendimin e nxjerrë pak ditë më parë./ABC News Albania 24/7
