Loading ...
Këshilli i Mbrojtjes i Iranit ka kërcënuar të vendosë mina detare në të gjithë Gjirin Persik nëse SHBA-të nisin një pushtim tokësor.
“Çdo përpjekje nga armiku për të synuar brigjet ose ishujt e Iranit, natyrisht dhe në përputhje me praktikën e vendosur ushtarake, do të çojë në minimin e të gjitha rrugëve të aksesit… në Gjirin Persik dhe përgjatë bregdetit. Në këtë rast, i gjithë Gjiri do të jetë praktikisht në një situatë të ngjashme me Ngushticën e Hormuzit për një kohë të gjatë… nuk duhet harruar dështimi i më shumë se 100 anijeve në vitet 1980 në heqjen e disa minave detare”, tha Këshilli.
Sipas faqes amerikane të lajmeve Axios, Uashingtoni po shqyrton planet për të pushtuar ose bllokuar ishullin Kharg të Iranit, qendrën kryesore të eksportit të naftës në vend, për të ushtruar presion mbi Teheranin që të rihapë Ngushticën e Hormuzit.
Më herët gjatë fundjavës, presidenti amerikan, Donald Trump kërcënoi se do të “shkatërronte plotësisht” centralet energjetike iraniane nëse Ngushtica nuk do të rihapej brenda 48 orësh.
Irani thotë se Ngushtica është “e hapur për të gjithë përveç atyre që shkelin territorin tonë”, por paralajmëron se është i gatshëm ta mbyllë “plotësisht” hyrjen në këtë rrugë ujore nëse infrastruktura e tij energjitike sulmohet./abcnews.al
