Martin Braithwaite firmosi sot me Barcelonën deri në verën e vitit 2024. Klubi katalanas pagoi 18 milion euro, ndërkohë që klauzola e largimit të sulmuesit danez është 300 milion euro. Ai ka folur për faqen e klubit, duke treguar emocionet e kalimit nga Leganes te Barcelona.
“Jam shumë i entuziazmuar që jam këtu, një ëndërr e bërë realitet. Të gjithë ata që luajnë futboll ëndërrojnë të luajnë me Barcelonën. Jam këtu, me një dëshirë shumë të madhe. Dua të fitoj shumë tituj. Jem në një klub ku ka shumë presion për fitore dhe pritshmëritë janë të larta. Shpresoj të fitoj gjithçka të mundshme”, deklaron Braithwaite, i cili më tej përshkruan veten.
“Unë jam një lojtar teknik. Gjithashtu jam lojtar fizik, i shpejtë, i fortë. Karakteristika ime më e madhe është që unë jam inteligjent. Studioj lojën dhe gjithmonë përpiqem të përmirësoj lojën time me lëvizjet e mia. Jam golashënues dhe shpresoj të realizoj sa më shumë gola”, shton sulmuesi.
Braithwaite do të ketë mundësinë të luajë me Lionel Messi dhe sigurisht që ka folur edhe për të pas firmosjes së kontratës me Barcelonën. “Messi është ndoshta lojtari më i mirë në historinë e futbollit. Të luaj me të është diçka e shkëlqyeshme për mua dhe gjithmonë do të mund të them se kam luajtur me të”, përfundon sulmuesi më i ri i katalanasve. /abcnews.al
