Aylin Woodward, Business Insider
Tashmë kemi një përgjigjen ndaj një pyetje thelbësore në lidhje me Covid-19: Sa zgjat imuniteti?
Një studimi i ri, sugjeron se pacientët e rikuperuar nga koronavirusi, kanë të ngjarë të kenë një imunitet të fortë, që vazhdon për të paktën 8 muaj.
Dhe kjo kujtesë mbështetet në më shumë elementët sesa vetëm antitrupat. Ajo përfshin gjithashtu qelizat e bardha të gjakut, të njohura si qelizat T, dhe qelizat B që kanë një fuqi të madhe të kujtesës së tyre. Të kombinuara bashkë, këto shtresa mbrojtjeje, i japin mundësi sistemit imunitar që të njohë dhe ri-sulmojë koronavirusin, nëse ai e pushton sërish trupin, duke parandaluar kësisoj një infektim të ri.
Për të vlerësuar se sa zgjat imuniteti ndaj Covid-19 nëpër këto shtresa të ndryshme të sistemit imunitar, shkencëtarët matën se sa dhe cilat lloje të qelizave imune u rikuperuan tek pacientët me koronavirus disa muaj pasi ishin sëmurë.
“Tek shumica krijohet një reagim i madh imunitar ndaj këtij virusi, dhe kjo zgjat 6-8 muaj”- thotë Shejn Kroti, virologe në Institutin La Jolla për Imunologji në SHBA, gjithashtu edhe bashkautorë e studimit. Disa studime kanë sugjeruar se numri i antitrupave të krijuara nga koronavirusi që e mbrojnë trupin nga infeksioni, bie brenda disa muajve.
Por shqetësimet në lidhje me këto zbulime, mund të ulin rolin e qelizave T vrasëse, të cilat identifikojnë dhe shkatërrojnë qelizat e infektuara, si dhe qelizat ndihmëse T, që i orientojnë qelizat B se si të krijojnë antitrupa të rinj.
Grupi i ekspertëve mati të dyja llojet e qelizave T, por edhe qelizat B dhe antitrupat, në mostrat e gjakut nga 185 njerëz që ishin rikuperuar nga Covid-19.
Gati 40 nga pjesëmarrësit dhuruan disa herë gjak, disa më shumë se 6 muaj pas infektimit të tyre. Kjo gjë i dha mundësi studiuesve, të vlerësojnë se si ndryshoi me kalimin e kohës reagimi i sistemit imunitar të pacientëve.
Rezultatet e tyre, treguan se nivelet e qelizave T specifike të koronavirusit tek pacientët, ranë pak midis 4-6 muajsh, dhe më pas mbetën në nivele të qëndrueshme. Studiuesit mendojnë se ka të ngjarë që qelizat T dhe antitrupat të jenë të qëndrueshme pas 6 muajsh, pasi kjo është tipike edhe për viruset e tjera.
“Duhen 1 ose 2 javë që pas një infeksioni të zhvillohen antitrupat dhe reagimet ndaj qelizave T. Ato më pas rriten dhe arrijnë kulmin”- thotë Alesandro Sete, një imunolog në Institutin La Jolla. Gjithashtu, rezultatet e studimit treguan se nivelet e qelizave B tek pacientët, u rritën periudhës 1-6 mujore.
Kjo është diçka shumë pozitive, shpjegon Sete, pasi qelizat B janë burimi i antitrupave në të ardhmen. “Sapo përfundon pushtimi fillestar viral, qelizat B do të ndalojnë së luftuari, dhe për pasojë do ndalojnë së prodhuari antitrupa. Por ato janë ende atje, nëse rinis sulmi. Nëse keni një ‘ushtri në rritje” të qelizave B që qarkullojnë në trup, kjo do të rigjeneronte një përgjigje të antitrupave”- thekson ai.
Sete dhe Kroti, mundën të vëzhgonin vetëm pacientët e prekur nga koronavirusi dhe të shëruar deri 8 muaj pas infektimit, pasi pandemia filloi vetëm rreth një vit më parë. Por ata mendojnë se shkalla e ngadaltë e rënies së numrit të qelizave T dhe qelizave B tek pacientët, nënkupton se ato qeliza do të ekzistojnë shumë më gjatë, sesa periudha kohore e analizuar në studim.
Qelizat e bardha të gjakut, të zhvilluara në përgjigje të viruseve të tjera, mund të qëndrojnë në trupin e njeriut për vite me radhë. Për shembull qelizat T specifike kundër sëmundjes së lisë, mund t’i duhen rreth 10 vite që të zhduken pas një infeksioni, ndërsa qelizat B të prodhuara për të luftuar po atë virus, rrinë aty për 60 vite.
Qelizat T specifike për SARS-in, një tjetër koronavirus që ka 80 për qind të kodit të tij gjenetik të ngjashëm me Covid-19, duket gjithashtu se ekzistojnë për një kohë të gjatë në trupin e njeriut. Por derisa shkencëtarët të kenë më shumë kohë në dispozicion për ta studiuar virusin, theksojnë Sete dhe Kroti, nuk do të ketë asnjë mënyrë për të parashikuar se sa do të zgjasë imuniteti i një personi të caktuar ndaj koronavirusit, pasi është infektuar njëherë./abcnews.al
