Një debat i ashpër që degradoi deri me prekje fizike ka ndodhur në Velipojë mes punonjësve të Inspektoratit të Mbrojtjes së Territorit, FNSH-së dhe pronarëve të objekteve të ndërtuara në këtë bregdet.
Këta të fundit kundërshtuan aksionin e prishjes së objekteve që kanë ngritur në plazh.
Mes pronarëve spikati dhe prezenca e kreut të PD-së në Velipojë Nikoll Marku i cili ka dhe një lokal.
Këto objekte dhe lokale sezonale që shërbejnë gjatë muajve të verës janë ngritur pa leje.
Pronarët e bizneseve thonë se për aksionin nuk janë lajmëruar më herët.
“Po na hiqni bukën e fëmijëve, nuk kemi marrë njoftim zyrtar”, thotë një prej tyre.
Gjithsesi policët u bënë gardh dhe nuk lejuan më ndërhyrjen e tyre. Objektet u shembën.
Të tjera objekte pa leje u prishën dhe në Karaburun por me sa duket nga pamjet poseduesit e tyre nuk do kenë patur informacion për aksionin e IMT-së, dhe nuk ishin prezent.
Inspektori Kombëtar i Mbrojtjes së Territorit ka nisur në orët e para të mëngjesit të sotëm aksionin për prishjen e ndërtimeve pa leje në vijën bregdetare në Velipojë, Shkodër dhe në Karaburun, në Vlorë./abcnews.al
