“Katalanasit” e Barcelona arritën një fitore të madhe, fundjavën që sapo lamë pas, teksa mbrëmjen e së shtunës, mundën me “manita” skuadrën e Real Betis, në përballjen e vlefshme për javën e 5-të të Kampionatit spanjoll të futbollit, La Liga.
Progatonist në këtë fitore ishte padyshim dyshja portugeze Joao Felix-Joao Cancelo, me të dy lojtarët që shënuan nga një gol, duke “bindur” teknikun Xavi që ka bërë zgjedhjen e duhur gjatë merkatos së verës për të afruar në “Camp Nou” këta të dy lojtarë.
Për performancën e tyre disa fjalë i tha dhe vetë tekniku spanjoll, i cili për mediat pas fitores së madhe 5 me 0 komplimentoi jo pak dyshen “luzitane” për përshtatjen e tyre me skemat e lojës së “blaugranave”.
“Cancelo dhe Felix janë shumë të lumtur, janë në klubin e ëndrrave të tyre dhe duhet ta shfrytëzojnë këtë. Bënë diferencën ndaj Betis dhe e kanë ngritur shumë nivelin e skuadrës. Sigurisht bëhet fjalë për dy lojtarë me shumë cilësi dhe duhen menaxhuar mirë.
Cancelo e “lexon” shumë mirë lojën, kjo edhe pse është stërvitur nga trajneri më i mirë. Nga ana tjetër, Felix interpretoi në mënyrë të shkëlqyer atë çfarë i kërkuam, kemi punuar shumë duke i treguar video. Të dy ata na japin më shumë alternativa pasi fitojnë duele, krijojnë hapësira dhe thyejnë linjat e kundërshtarëve”,- u shpreh tekniku spanjoll. /i.m /abcnews.al
