TIRANË- Anëtarësimi i Shqipërisë në Zonën Unike të Pagesave në Euro (SEPA) pritet të sjellë lehtësi në kryerjen e pagesave ndërkombëtare me kosto më të ulëta dhe në kohë më të shpejtë.
SEPA i bën pagesat ndërkufitare midis vendeve anëtare në të po aq të thjeshta dhe të lira sa pagesat brenda vendit.
Me pjesëmarrjen në SEPA, mundësohet zbatimi i parimit të tarifave të barabarta, si për pagesat kombëtare, ashtu edhe për ato ndërkufitare të përpunuara në mënyrë elektronike në euro.
Në kushtet aktuale, transfertat dhe pagesat me vendet e Bashkimit Europian dhe anasjelltas kryhen nëpërmjet bankave korrespondente, që përfaqësojnë një kanal të kushtueshëm dhe joefikas për sa i përket kohës së ekzekutimit të transaksionit, monitorimit të finalizimit të tij, transparencës së kushteve të punës dhe mbrojtjes së konsumatorit.
Drejtor i Shoqatës së Zyrave të Këmbimit Valutor, Dritan Vakaj, i ftuar në “Money Report” u shpreh se përfshirja në këtë sistem do krijojë lehtësira.
“Kemi prezencë të madhe të eurove. Sektori i ndërtimit, turizmi, mbetën në dominancën e monedhës euro. Kemi transfertë të larta në numër, por edhe në volum. Ne kemi 6-7 miliardë të transaksioneve, e cila përkon me rrethe 50% e GDP. Aksesi në SEPA na mundëson kryerjen e transaksioneve në euro më shpejt, dhe përfshirja në këtë sistem është garanci për vetë institucionet bankare. Flasim për kohë më të shpejtë, kosto më të ulët dhe siguri më e lartë”, u shpreh ai.
Ai theksoi se industria financiare suksesin kryesor e ka në përdorimin e kohës me efikasitet dhe në këtë pikë, prezenca në SEPA, do ketë impakt të përgjithshëm në ekonominë e Shqipërisë.
“Në tërësi përfiton ekonomia. Ne flasim për një industri financiare ku ka rëndësi minuta dhe jo më dita. Shqipëria po hyn në tregjet ndërkombëtare dhe po bëhet kompetitive në sektorët e saj. Ndikon turizmin, importet, eksportet, qytetarët e thjeshtë”, theksoi ai.
Shqipëria do të aplikojë për t’u bërë pjesë e sistemit në muajin qershor, ndërsa Guvernatori i Bankës qendrore, Gent Sejko, tha se nga ky proces do kursehen 20 milionë euro, shumë kjo që sot shkon si pagesë në tarifat e transfertave./ n.m.abcnews.al
