Ndryshimet e reja në Kodin Zgjedhor të arritura në marrëveshjen politike të 5 qershorit kanë hyrë zyrtarisht në fuqi ditën e sotme, 15 ditë nga botimi në fletoren zyrtare.
Komisioni Qendror i Zgjedhjeve, një prej hallkave kryesore të administrimit të zgjedhjeve do të marrë një formë tjetër me hyrjen në fuqi të këtyre ndryshimeve.
Tashmë ai do të përbëhet nga Komisioneri Shtetëror i Zgjedhjeve, Rregullatori dhe Komisioni i Ankimeve dhe Sanksioneve që presin të plotësohen me anëtarë pas thirrjes së Kuvendit.
Anëtari i Komisionit Qendror të Zgjedhjeve Bledar Skënderi ka publikuar ndryshimet e reja ku thuhet se ai dhe pjesa tjetër e trupës së KQZ-së do të qëndrojnë në detyrë deri në ditën e zgjedhjes së Komisionerit.
Skënderi thotë se trupa e KQZ-së u vu në pozita shumë të vështira për shkak të përplasjeve politike, duke u shprehur u përpoqën të menaxhonin situata deri absurde!
“Sot hyjnë në fuqi ndryshimet e Kodit Zgjedhor! Sipas dispozitave të reja mandati i antarëve aktualë ndërpritet,por qëndrojmë në detyrë deri ditën e zgjedhjes së Komisionerit !
Përplasjet politike të forta e vunë trupën e KQZ-së në situata shumë të vështira! Ne u përpoqëm të menaxhonim situata deri absurde!
Ndoshta sikundër tha dhe Shefja e misionit te OSBE-ODHIR Audrey Glover u treguam pak”Kreativë”!
Gjithsesi jam absolutisht i bindur që kemi bërë më të mirën për të ardhmen euroatlantike të Shqipërisë!
Jam krenar se punova si pjesë e një trupe nga më profesionistet që ka patur ndonjëherë KQZ. Një falenderim të veçantë kam për të gjithë stafin e institucionit!
I uroj Komisionerit,Ndihmës Komisonerit,dhe dy trupave të reja që do të zgjidhen punë të mbarë!”, shkruan Skënderi.
/abcnews.al
