Kalimi në një dietë me shumë perime të freskëta dhe pa ushqime të përpunuara mund të ndikojë ndjeshëm në moshën biologjike të trurit, tregon një studim i ri.
Një dietë mesdhetare e pasur me perime, ushqime deti dhe drithëra duket se ngadalëson shenjat e plakjes së përshpejtuar të trurit që zakonisht vërehen te njerëzit e trashë.
Mosha jonë në vite nuk përkon domosdoshmërisht me moshën biologjike të organizmit apo me ndjenjën dhe energjinë që kemi. Nëse jetojmë një jetë jo të shëndetshme, trupi ynë mund të plaket më shpejt se ne. Në të kundërt, plakja biologjike e shkaktuar nga ngjarje stresuese mund të jetë e kthyeshme, siç tregohet në këtë studim; domethënë, ushqimi më i mirë mund të jetë një nga opsionet më të thjeshta për përmirësimin e gjendjes fizike.
Gjatë studimit, shkencëtarët imazhuan trurin e 102 pjesëmarrësve në Izrael, të cilët po merrnin pjesë në një studim klinik më të madh. Ata skanuan trurin para fillimit të studimit dhe më pas pas 18 muajsh. Ata gjithashtu testuan funksionin e mëlçisë, nivelet e kolesterolit dhe peshën trupore.
Subjektet u ndanë në tre grupe: njëri ishte në një dietë mesdhetare me shumë arra, peshk dhe pulë në vend të mishit të kuq; e dyta në një dietë mesdhetare me suplemente si çaji jeshil dhe e treta në një dietë të bazuar në udhëzimet e të ushqyerit të shëndetshëm.
Pjesëmarrësit humbën mesatarisht 2.3 kilogramë gjatë provës klinike. Shkencëtarët zbuluan se për çdo 1 për qind të peshës trupore të humbur pas një diete të caktuar ose udhëzimeve shëndetësore, truri i pjesëmarrësve dukej gati nëntë muaj më i ri se mosha e tyre kronologjike, raporton Science Alert .
Shenjat e plakjes së ngadalësuar të trurit u shoqëruan gjithashtu me nivele më të ulëta të yndyrës së mëlçisë dhe një profil të përmirësuar të lipideve.
“Studimi ynë nxjerr në pah rëndësinë e një stili jetese të shëndetshëm, i cili përfshin më pak konsum të ushqimeve të përpunuara, ëmbëlsirave dhe pijeve, për ruajtjen e shëndetit të trurit,” tha neuroshkencëtari Gidon Levakov nga Universiteti Ben-Gurion në Izrael.
Faktorë të tjerë mund të kenë ndikuar në ndryshimet pozitive
Duhet theksuar se pjesa më e madhe e pjesëmarrësve ishin meshkuj dhe se ata plotësuan sondazhe online për dietën dhe stilin e jetesës, çka do të thotë se disa të dhëna mund të “shtrembërohen”, pra të natyrës subjektive. Për më tepër, rezultatet e këtij studimi mund të mos varen vetëm nga dieta e pjesëmarrësve.
Gjegjësisht, gjatë studimit, të anketuarit kanë marrë një anëtarësim falas në palestër, kështu që ushtrimet kanë pasur një ndikim të caktuar. Hulumtimet e mëparshme kanë zbuluar se yndyrat e mira të dietës mesdhetare funksionojnë në nivel qelizor, por edhe dallimet në atë se kush korr përfitimet shëndetësore të një diete të pasur me ushqime mesdhetare.
Njerëzit me punë me pagesë të lartë dhe diploma kolegji që mund të përballonin ushqime të pasura me peshk dhe drithëra integrale panë përmirësime më të mëdha në shëndetin kardiovaskular sesa ata me të ardhura të ulëta – edhe nëse respektimi i dietës së tyre ishte i njëjtë.
Hulumtimi Efekti i humbjes së peshës pas 18 muajve të ndërhyrjes në stilin e jetës në moshën e trurit të vlerësuar me lidhjen funksionale të gjendjes së pushimit u botua në revistën eLife.
