I është dhënë sot lamtumira e fundit Rezarta Hajdarit. 19-vjeçarja humbi jetën tre ditë më parë në dhomën e saj të gjumit, 5 ditë pasi ishte martuar, në fshatin Xhyrë të Librazhdit.
Familjarët mes lotësh kanë përcjellë për në banesën e fundit të renë, vdekja e të cilës mbetet ende mister.
Rezarta u gjet e vdekur nga familjarët e bashkëshortit të saj, Olsi Hajdari, ndërsa ky i fundit u dërgua në gjendje të rëndë në spital. 27-vjeçari qendroi dy ditë në koma, ndërsa mbrëmjen e djeshme u kthye në shtëpinë e tij në gjendje të stabilizuar.
Në një prononcim për Abc News, Olsi u shpreh se nuk mban mend asgjë nga ajo që ka ndodhur. Ndërsa kujton se atë natë pasi kishin ngrënë darkë, kishin marrë në dhomën e tyre mangall për tu ngrohur.
Po ashtu edhe familjarët e Olsit pretendojnë se çifti u asfiksua nga mangalli, çka solli edhe vdekjen e Rezartës.
Mirëpo, një gjë e tillë nuk pranohet nga familjarët e viktimës, të cilët kërkojnë të zbardhet e vërteta, ndërsa kanë bërë denoncim në polici.
Do të jetë ekspertiza mjeko-ligjore që pritet të përcaktojë shkakun e vdekjes së të resë.
/abcnews.al
