Ish-diplomati serb, Zoran Milivojeviq tha se ambasadorët e rinj amerikanë të emëruar në Ballkan do ta shtojnë presionin ndaj Serbisë për ta njohur pavarësinë e Republikës së Kosovës.
Duke komentuar mbërritjen e ambasadorit të ri amerikan në Prishtinë, Milivojeviq tha se Jeff Hovenier është i pari nga “tre të mëdhenjtë” e ambasadorëve të rinj të SHBA-së që vijnë në rajon, veçanërisht në Prishtinë, Beograd e Sarajevë.
“Ata do të jenë përgjegjës për zgjidhjen e punëve të papërfunduara në Kosovë dhe Bosnjë e Hercegovinë, më saktë do të insistojnë në centralizimin e Bosnjës dhe do të bëjnë presion ndaj Serbisë që ta njohë Kosovën”, tha Milivojeviq për Tanjug.
Sipas tij, kjo është strategjia e politikës së jashtme të administratës amerikane të Presidentit Joe Biden.
“Tashmë kemi dinamikë rreth Bosnjë-Hercegovinës dhe pres që këtë vit të kemi dinamikë rreth Kosovës, prandaj ardhja e ambasadorit të ri në Prishtinë është fillimi i realizimit të asaj strategjie të hartuar nga administrata e re dhe Departamenti i ri i Shtetit. Sigurisht që është një presion i ri ndaj Serbisë për ta zgjidhur këtë çështje dhe për ta zgjidhur atë në frymën e asaj që Presidenti Biden njoftoi pas marrjes së detyrës në mesazhet e tij uruese ku foli për njohjen reciproke”, tha Milivojeviq.
Kjo të cilën ai e quan bazë të strategjisë diplomatike amerikane në rajon, tha do të promovohet nga ambasadori i ri amerikan në Prishtinë, Jeff Hovenier, si dhe nga ambasadori i ri në Beograd, Christopher Hill.
Diplomati i pensionuar serb thotë se gjëja vendimtare për Amerikën është që “të kompletohet shtetësia e Kosovës”. Tjetër gjë, thotë ai, është edhe parandalimi i ndikimit të Rusisë dhe Kinës në Ballkan.
“Ambasadorët Howener dhe Hill do të kenë të njëjtën detyrë dhe unë mendoj se ata do të koordinohen me njëri-tjetrin dhe sigurisht do të koordinohen me Brukselin”, tha Milivojeviq.
Ambasadori i ri i SHBA-së në Kosovë, Jeff Hovenier dje dorëzoi letrat kredenciale te presidentja Vjosa Osmani, ndërsa filloi ditën e parë të punës së re duke bërë homazhe te shtatorja e presidentit të parë të Kosovës, Ibrahim Rugova në kryeqytet.
Ambasadorit Hovenier i uroi mirëseardhje në Prishtinë edhe kryeministri Albin Kurti, por edhe raportuesja për Kosovën në Parlamentin Evropian, Viola von Cramon. Kjo e fundit shkroi në Twitter se mezi pret të takohet me ambasadorin e ri amerikan.
“Mirë se erdhët në Prishtinë Ambasador Hovenier! Mezi pres të takohem me ju dhe ekipin tuaj dhe ta përforcojmë bashkëpunimin e mëtejshëm BE – SHBA”, shkroi ajo.
Ambasadori i ri i Shteteve të Bashkuara të Amerikës, Jeff Hovenier tha dje se “është nder i jetës sime që të shërbej si ambasador i SHBA-së në Kosovë”, ndërsa theksoi se Kosova dhe njerëzit e saj janë në duar të sigurta./Express
