Gazeta amerikane “New York Times” akuzon ish-sekretaren e Shtetit, Hillary Clinton se fshehu një skandal seksual gjatë fushatës presidenciale të vitit 2008, kur ajo garonte kundër Barack Obama për kandidatin e demokratëve.
Një ish-këshilltar i stafit elektoral të Hillary Clinton në vitin 2008, i cili u akuzua vazhdimisht për ngacmim seksual ndaj një vartëseje, u mbrojt nga ish-zonja e parë e Amerikës. Lajmin e bën të ditur “New York Times”, që citon katër persona në dijeni për ngjarjen, të cilët pretendojnë se kishte qenë pikërisht Clinton që kishte kërkuar mbajtjen sekret të skandalit.
Ankesa ndaj këshilltarit Burns Strider u bë nga një 30-vjeçare, e cila e akuzoi atë se i kishte prekur shpatullat në mënyrë të papërshtatshme, se e kishte puthur në ballë dhe se i kishte dërguar email-e provokuese, edhe gjatë natës. Kjo konfirmohet nga katër ish-pjesëtarët e stafit elektoral, sipas të cilëve ankesa i shkoi në vesh edhe ish-zonjës së parë, të cilës iu sugjerua shkarkimi i Strider, por ajo refuzoi për hir të fushatës.
Sipas gazetës prestigjoze, zotit Strider iu dha rroga për disa javë dhe u urdhërua të këshillohej me një mjeke, ndërsa vajza e re e ngacmuar u lëviz në një vend tjetër pune. Strider, që ishte këshilltari i besuar i zonjës Clinton dhe kujdesej për fjalimet e saj, u punësua sërish 5 vjet më vonë për të drejtuar një grup të pavarur që mbështeti kandidaturën e saj në vitin 2016 kundër Donald Trump. I kontaktuar nga “New York Times”, Strider ka refuzuar të bëjë komente e po ashtu edhe menaxherja e fushatës që kishte denoncuar rastin tek shefja e saj.
